Dakul an kamatis
Sa piggisa mong amargoso,
Piglaagan mo pang dakul na bawang buda sibulyas,
Pamita buda asin sana, lingawon na an toyo,
Pigtaram mo kaiba an paglayog nin salampati mong ngirit sakuyang puso.
Kan pigtaram ko na masiram
Buda dai naglumoy sa kalayo an isira,
Magtubod ka,
Magtubod ka ta kan pigiilusyunan taka,
Tunay an sakong mga pigtaram manungod sa mga bitoon,
Na saro sindang rason tanganing kita mabuhay,
Tunay na dai ko aram an puro nin sakong pagbiyahe nin 3am
Tanganing bumiyahe nin sarong oras para maayos ta an dai pagkakasinabutan,
Arog man kaan ngunyan
Pag pigtataram ko saimo
Na naglayog ako sa pagdutdot nin sakuyang dila
Sa sabaw nin saimong isira,
Magtubod ka,
Ta iyo man sana an muya ko,
An gabos sakuyang gigibuhon tanganing
An gabos na namit digdi sa kinaban, masiram.
This poem has not been translated into any other language yet.
I would like to translate this poem