She's An Awfu' Lassie Jenny Poem by Alexander Anderson

She's an awfu' lassie, Jenny,
No' her like in a' the toon,
For her heid is fu' o' mischief,
And her hair is hingin' doon.
What a faught maun ha'e her mither
Frae the mornin' till the nicht,
But she's awfu' like her granny,
An' that pits wee Jenny richt.


I ha'e tried to coort wee Jenny
But she'll no' ha'e me ava',
She wad raither ha'e a penny
To buy sweeties or a ba',
When I speak o' oor sweetheartin',
Just as lown as lown can be,
Wad ye think it for a moment?
She pits oot her tongue at me.


She's an awfu' lassie Jenny,
Yet a denty, bonnie quean,
An' there's licht, an' love, an' lauchter
A' at ance within her een.
Yet I ken fu' weel her mither
Maun get mony an unco fricht,
But she's awfu' like her granny
An' that pits wee Jenny richt.