Takilpo Poem by Hima chan

Ni-absent ko'g klase
kay gisugo lagi ko
sa maestra
pagpalit og Gilbey's ug four seasons
para humuon og punch.

Ug sa dihang natakilpo ko
sa dalan sa Colon
Pastilan
wala man kaha ko nag-heels
Ni wa pa gani ko katilaw sa punch.
Ngano kaha?

Pero sakit baya.
Grabe
Ang unang higayon.

Sa sunod nga adlaw
Igo ra gani ko naglakaw padulong
sa pikas bahin sa eskwelahan
Ug sa dihang natakilpo napud ko
Giahak nalang
Babaye man kaha ko
Pero di kahibalo modala og lakaw.

Bisan asa nalang
sa kalsada o sa estancia
takilpo, takilpo
nanghubag nalang intawn akong walang buol-buol.

Kumaw kaha ko?
Ambot lang.

Barang?
Sus ko po.

I-ampo intawn
nga di nako matakilpo karon
ayaw intawn...
nag-heels baya jud ko karon

Kay usa nalang ka takilpo
Basin mayabo ang tanan
ug di na mapugngan
ang gibati nga dugay na
gikimkim.