John Skelton (1460 - 1529 / Norfolk, England)
A Ballad of the Scottsysshe Kyne
Kynge Jamy, Jomy your joye is all go.
Ye summoned our kynge. Why dyde ye so?
To you no thyng it dyde accorde
To sommom our kynge your soverayne lorde.
A kynge a sommer it is wonder;
Knowe ye not salte and suger asonder?
In your somnynage ye were to malaperte,
and your harolde no thynge experte;
Ye thought ye dyde it full valyauntolye,
But not worth thre skyppes of a pye.
Syr squyer-galyarde ye were to swyfte;
Your wyll renne before your wytte.
To be so scornefull to your alye
Your conseyle was not worth a flye.
Before the Frensshe kynge, Danes and other
Ye ought to honour your lorde and brother.
Trowe ye, Syr James, his noble grace
For you and your Scottes wolde tourne his face?
Now ye proude Scottes of Gelawaye
For your kynge may synge welawaye.
Now must ye knowe our kynge for your regent,
Your soverayne lorde and presedent.
In hym is figured Melchisedeche,
And ye be desolate as Armeleche.
He is our noble champyon,
A kynge anoynted, an ye be non.
Thrugh your counseyle your fader was slayne;
Wherfore I fere ye wyll suffre payne.
And ye proude Scottes of Dunbar,
Parde ye be his homager
And suters to his paylyment.
Ye dyde not your dewty therin,
Wyerfore ye may it now repent.
Ye bere yourselfe somwhat to bolde,
Therfore ye have lost your copyholde.
Ye be bounde tenauntes to his estate;
Give up your game, ye playe chek mate;
For to the castell of Norham
I understonde to soone ye cam,
For a prysoner therenow ye be
Eyther to the devyll or the trinite.
Thanked be saynte Gorge, our ladyes knythe,
Your pryd is paste, adwe, good nycht,
Ye have determyned to make a fraye,
Our kynge than beynge out of the waye;
But by the power and myght of God
Ye were beten weth your owne rod.
By your wanton wyll, syr,at a worde,
Ye have loste spores, cote armure and sworde.
Ye had be better to have busked to Huntley Bankes,
Than in Englonde to playe ony suche prankes;
But ye had some wyld sede to sowe,
Therefore ye be layde now full lowe.
Your power coude no lenger attayne
Warre with our kynge to meyntayne.
Of the kynge of Naverne ye may take hede
How unfortunately he doth now spede;
In double walles now he dooth dreme.
That is a kynge without a realme.
At hym example ye wolde none take;
Experyence hath brought you in the same brake.
Of the out yles ye rough foted Scottes
We have well eased you of the bottes.
Ye rowe ranke Scottes and dronken Danes
Of our Englysshe bowes ye have fette your banes.
It is not syttynge in tour nor towne
A sumner to were a kynges crowne.
That noble erle, the Whyte Lyon,
Your pompe and pryde hath layde a downe.
His sone the lorde admyrall is full good,
His swerde hath bathed in the Scottes blode.
God save kynge Henry and his lordes all
And sende the Frensshe kynge suche another fall.
Amen, for saynt charyte and God save noble
Kynge Henry the viij.
Comments about this poem (A Ballad of the Scottsysshe Kyne by John Skelton )
Top 500 Poems
The Road Not Taken
If You Forget Me
Still I Rise
Edgar Allan Poe
I Know Why The Caged Bird Sings
Stopping by Woods on a Snowy Evening
William Ernest Henley