Ma,
'Andito na si papa!
katatapos lang
sa concert ng beer.
Dala pa niya
ang kanyang mga fans-
naggagandahang mga babae,
super fans talaga sila
ni papa, ano?
kasi,
lagi ko
silang nakikita-
nagpapaautograph kay papa
sa loob ng kwarto
Ma,
salubongin mo na si papa
dali,
gusto kong makita uli
ang pinakaaabangan kong
exclusive na concert
dito sa bahay-
ang duet n'yo ni papa.
Ang galing talaga n'un
sa bawat birit mo,
sinasagot ka'gad ni papa,
itinatayming pa n'ya
sa paghampas
ng mic,
stereo at speaker
sa iyo-
pak, pak, bog,
tsak, pak, pak!
pero
'di ba para sa drums lang 'yon?
'di bale na,
ang galing naman ng performance n'yo.
Ma,
ang galing talaga ni papa,
idol ko siya,
paglaki ko
gusto kong maging katulad n'ya-
isang mahusay na performer.
This poem has not been translated into any other language yet.
I would like to translate this poem