Balak Alang Kang A. Poem by RIC BASTASA

Balak Alang Kang A.

musta na? bugnaw na ba kaayo diha?
lami kuno ang mga pagkaon diha?
nindot daw ang mga dahon sa kahoy
morag bulawan nga gagilakgilak sa
pag-abot sa adlaw

daghan daw ang kasuroyan diha
mabudlat gyod ang mga mata sa kadaghan
sa talan-awon nga dili gayod nato makita
sa atoang lugar

musta na? aykog ingna nga mouli ka na
kay gimingaw ka na sa imong mga
higala?
unsa to? walay kinilaw diha? walay tuba?
walay tagay? walay tapok-tapok og hisgot
hisgot kabahin sa mga ginagmayng kalipay?

mao ba? daghang balay apan walay mga tawo
daghang miabot apan sigi lang pong pahawa?
tinood ka?

winter na. Unya kaw rang usa sa
imong gipuy-an
unya kon duawon ka
pang-week end lang?
unya kon isuroy ka, i-drop ka lang
sa mall
unya ikaw na ang bahala

ayay, na hala, pauli na.
manirang unya ta.

Friday, November 20, 2015
Topic(s) of this poem: life
COMMENTS OF THE POEM
READ THIS POEM IN OTHER LANGUAGES
RIC BASTASA

RIC BASTASA

Philippines
Close
Error Success