| |
Why dois your brand sae drap wi' bluid,
Edward, Edward?
Why dois your brand sae drap wi' bluid?
And why sae sad gang ye, O?
O, I hae killed my hauke sae guid,
Mither, mither,
O, I hae killed my hauke sae guid,
And I had nae mair bot hee, O.
Your haukis bluid was nevir sae reid,
Edward, Edward,
Your haukis bluid was nevir sae reid,
My deir son I tell thee, O.
O, I hae killed my reid-roan steid,
Mither, mither,
O, I hae killed my reid-roan steid,
That erst was sae fair and frie, O.
Your steid was auld, and ye hae gat mair,
Edward, Edward,
Your steid was auld, and ye hae gat mair,
Sum other dule ye drie, O.
O, I hae killed my fadir deir,
Mither, mither,
O, I hae killed my fadir deir,
Alas, and wae is mee, O.
And whatten penance wul ye drie for that,
Edward, Edward?
And whatten penance will ye drie for that?
My deir son, now tell me, O.
Ile set my feit in yonder boat,
Mither, mither,
Il set my feit in yonder boat,
And Ile fare ovir the sea, O.
And what wul ye doe wi' your towirs and your ha',
Edward, Edward?
And what wul ye doe wi' your towirs and your ha',
That were sae fair to see, O?
Ile let thame stand tul they doun fa',
Mither, mither,
Ile let thame stand tul they doun fa',
For here nevir mair maun I bee, O.
And what wul ye leive to your bairns and your wife,
Edward, Edward?
And what wul ye leive to your bairns and your wife,
Whan ye gang ovir the sea, O?
The warldis room, late them beg thrae life,
Mither, mither,
The warldis room, let them beg thrae life,
For thame nevir mair wul I see, O.
And what wul ye leive to your ain mither deir,
Edward, Edward?
And what wul ye leive to your ain mither deir?
My deir son, now tell mee, O.
The curse of hell frae me sall ye beir,
Mither, mither,
The curse of hell frae me sall ye beir,
Sic counseils ye gave to me, O.
Thomas Percy
Read poems about / on: son, sea, sad, life
|
|
User Rating: |
|
--
/10
(0 votes) |
|
|
|
Thomas Percy
Free
Poetry E-Book:
E-mail this poem to e friend