Lay Bye Yere Bawbee Poem by Carolina Oliphant

Lay bye yere bawbee, my Jenny,
Lay bye yere bawbee, my dear,
Do as your mither aye did,
She tuik gude care o' her gear.

The way young kimmers are drest,
Wise folk are sorry to see;
Their winnin's are a' on their back,
And that's no the thing that sud be.

Work when ye're weel and ye're able,
Be honest and savin' ye're tauld;
'Twill help when trouble comes on,
And mak' ye respectit when auld.

Lasses and lads, tak' advice,
An' dinna ye gang for to woo,
Until ye hae gather'd the siller,
An' the weel plenish'd kist it is fu'.

Luik to Archie and Peggy,
They married on naething ava;
And noo she's beggin' and greetin';
An' Archie, he's listed awa'.