Lehu Poem by madihlare christobeth molapo

Mereba ya gago ga e na tshwantšhanyo,
Swele yona le botloutona ba e rolela mongatse,
Poifo ga se segageno ke a go rerešetša,
Ka difokeng o tsena o sa tamiše metseta,
Serokaphatla wa itebanya le magoši.
O kobaobane se inyadiša malapeng ka moka,
Tseba ya gago e feroša le baloi dibete,
Megokgo ya batho o e hlabela mokgolokwane,
Wa re go bona bana ba thari e le mokwano
Wa ba aroganya ba hlolana ka diolo.
Ya gago pelo e kgabišitše ka boya thobela,
Ya gago mpa ga e kgebe segošane
O lemetše o lemile le dinaka motho’a batho,
O kgobokeditše borakgolokhukhu ba rena
Le rena o sa re gola wa tšie.
O yena mphenyašilo le lešoko ga o nalo,
O rwala batho le diphoofolo ga o hlaole,
Mahlo a gago a lebeletše gohle
Le ka maweng o a re bona
Kganthe o re re tšhabele kae?
86 Tsa Borala