Hew Ainslie (5 April 1792 - 11 March 1878 / Dailly, Ayrshire Scotland)

Let's drink to our next meeting, lads,
Nor think on what's atwixt;
They're fools wha spoil the present hour
By thinking on the next.

Chorus
Then here's to Meg o' Morningside,
An Kate o' Kittlemark;
The taen she drank her hose and shoon,
The tither pawned her sark.

A load o' wealth, an' wardly pelf,
They say is sair to bear;
Sae he's a gowk would scrape an' howk
To make his burden mair

Chorus

Gif Care looks black the morn, lads,
As he's come doon the lum,
Let's ease our hearts by swearing, lads,
We never bade him come.

Chorus

Then here's to our next meeting, lads,
Ne'er think on what's atwixt;
They're fools who spoil the present hour
By thinking on the next.

Chorus