lambang turo' may sadiring tanog
lambang turo' may sadiring lugar
lambang turo' may sadiring pangaran
kada tagdo' may kaibang panahon
kada tagdo' may kaibanan pang saro
kada tagdo' sarong turo na nagsusuhay
turo', tagdo', napalaen, napasuway
nawawara sa kasarabay na uran
nawawara, namamasyar sa sadiring kapanahonan.
saro, duwa, tulong-parte kan inaapat na nota
sarong may awit, sarong nagmamartsa, sarong namungnan
an kanta na saimong nadadangog, hematea!
iba man sa aniningal sa silensyo kan uran
sa silensyo sa pagultanan kan lambang turo' nin uran
sa katoninogan sa tahaw kan nawawarang turo' nin uran.
lambang saro turo sa panahon na mayo' digdi
lambang saro aniningal sa lugar na bako' ngonian
lambang saro turo na minalabaylabay sa saimong katoninongan
paduman sa lugar na dati man na kamayoan, mayong laman
kundi aniningal nin mga turo' nin uran
kung madangog mo sinda, pakisabi man
hugasan an purisaw sa mga turo' nin uran.