Panghupaw Sa Kagahapon Poem by bonifacio alba

Sa imong pagtukaw
Ning mabugnaw nga kagabhion
Gidagit sa hangin ang panghupaw
Balik sa kagahapon.

Diha sa imong tanaman
Nalantaw mo ang mga bulak
Nga milipang samtang gihapyod
Sa mabugnaw nga hangin.

Sa maong talan-awon
Milawig ang hunahuna
Paingon ngadto sa dapit
Nga puno sa damgo ug mga tanghaga.

Takulahaw nabati mo ang awit
Nga mugna sa kagahapon
Ug diha-diha milakdop ang kamingaw
Kay dili mobalik ang kabatan-on!