Pedon Se Alag Hote Patte.. Poem by abhilasha bhatt

Pedon ki shaakhon se alag hote
Patte
Alag hone k baad kahan apna wajood bacha paatin hain
Unka astitva tab tak hi to hota hai
Jab tak wo pedon ka hissa hai
Pedon ki shaakhon se toot jane k bad
Unka kahan koi puchne waala rehta hai
Anaath ho jaati hon maano
Ped se juda hokar
Ye patte kaise bikhar jaate hain
Ek aaine k tootne par jaise tukde bikhar jaate hon waise hi
Magar sochti hoon
Inko dard kaisa aur kitna hota hoga
Waisa jab koi sapna toot kar tukde tukde bikhar jaata hai
Dard un sapnon k is kadar toot kar bikhar jaane k dard se kam to nhi hota hoga
Ped ko bhi to takleef hoti hogi
Aakhir uska hissa tha wo
Seencha to us ped ne hi un patton ko
Maa baba ki tarah dhyan rakha hoga
Hoga bhi kya
Ped ki aulaadain
Yahin phool, patte, shaakhen, phal
Yahi sab to hai
Aur jadain to maa ki tarah hi seenchti hain
Pyar se dulaar se
Is tarah koi toofan agar unke bacchon ko
Unse alag kar jayen to takleef koi kam to nhi.hoti hogi
Unse jude hue unka jo hissa they kat jayen toot jayen to dard jaane kitna hota hoga
Phir wo bhichde patte kahin bhi jayen
Ped aur unki jadain kahan unhe bacha paate hain
Aur unke jaane par Kya sog manaate hain
Kyunki pedon par shaakhain aur bhi hain aur un shaakhon par patte aur bhi hain
Wo to bus apne karm karte jaate hain
Wo bhichde bikhre patte ab nirjeev bhi to ho jaate hain
Na khaana khilane k lie ped jaise ped aur unki shaakain
Maa ki tarah seenchti ped ki jadain
Phir Kya fark padta hai
Wo patte ud kar kahan jaate hain
Kisi k pairon k neeche aate hain
Kain paani main beh jaate hain
Koi kisi k dil k alfaazon ko bayaan krne main kore kaagaz ki tarah kaam karte hain
Koi hawa main ud kar jaane kahan gum hojaate hain
Koi mitti main milkar mitti k hi hojaate hain
Jab ped apne patton shaakhon se alag hokar jeena nhi chodte
Na unka jeevan rukta hai
Pehle jaisa tha ab bhi vaisa hai
Isi ko maan kar wo nirantar chalte hain
To phir ham insaan apnon dukhon ka
Apni taqleefon ka
Itne lambe waqt tak kyun sog manaata hai
Jo chala gya wo gya
Jo hain unke lie to jeena hi padta hai
Nhi to jo hain unke sath naainsaafi hi to hogi
Ped aur insaani jeevan
Kain had tak kitne milte hain.. :)