Dar Band Ho Chuke Hain, ...... (Ghazl) Poem by Saima Kanwal

Dar band ho chuke haiN mohabbat ke baab ke
Hum muntazir haiN aaj bhi tere jawab ke
Manzil na ban sake ga wo hum ko thi ye khabr
Dil bhaagta tha kyuN bhala peeche saraab ke

MadhoshiyoN meiN lutt gaye haiN ghar kayee yahaN
Warna to hum nahiN haiN mukhaalif sharaab ke
Jab se parhe haiN chehre usi pal se hum pe ab
Roshan hue haiN baab kayee ab nisaab ke

Humne wohi kiya hai, kiya tha jo aap ne,
KyuN hosh ur rahe haiN bhala ab janaab ke,
Boya tha aap ne jo wohi kaatiye hazoor
'Din aa gaye qareeb ab roz e hisaab ke'

To aisi baat kar E kaNwal, jiss se yuN lage
Jharne lage haiN phool laboN se gulaab ke