ଜାଣେ, ଏଠି
ଗଜାନନ ମିଶ୍ର
ଜାଣେ,
ଅଛନ୍ତି ଏଠି ଯେତେ।
ଆଉ ଜାଣେ
ଯୋଉମାନେ ନାହାନ୍ତି ବି।
ଅଛନ୍ତି ଆଉ ନାହାନ୍ତି,
ଏମାନଙ୍କ ଭିତରେ
ରଖି ନି ଫରକ ।
ଯେ କୌଣସି ଜାଗାରେ
ଯେ କୌଣସି ରୂପରେ
ଅଛନ୍ତି ଯୋଉ ଯୋଉମାନେ
ସଭିଙ୍କୁ ସ୍ୟାଲୁଟ।
ଆଉ ସମସ୍ତଙ୍କୁ ମୁଁ ରଖୁଛି ବାନ୍ଧି
ମୋରି କବିତାରେ ଶ୍ରଦ୍ଧାରେ।
ମାଟି ପାଣି ପବନ
ନିଆଁ ଆକାଶ
ଫେଣ୍ଟିଛି ସବୁକୁ
ମୋରି ବୁଦ୍ଧିରେ
ମନକୁମନ, କିନ୍ତୁ
ରଖି ନି ଅହଙ୍କାର ଟିକିଏ ।
ଆଉ ସମସ୍ତେ ସଳଖ
ସଂଯତ ଠିଆ ଏଠି
କବିତା ସାମ୍ନାରେ ।
କିଏ କଣ କହି କୁହାଇ
ଜାଣି ଜଣାଇ ନାଇଁ ଲାଭ ।
ଖୋଜିବା ଆଉ ପାଇବା,
ଯିବା ଆଉ ଫେରିବା ଭିତରର
ଫରକ ଉପରକୁ ଦିଶୁଥିଲେ ବି
ହୋଇ ସାରିଛି କୁହା
ସବୁ ଏକ।
ଆଉ ଯାହା ଜାଣିଛି
ଯେତେ, ସବୁକୁ
କରିଦେଇଛି ଗୋଳିଆ
ଏ ଆଲୋକ।
କହିଛି ସବୁ ଯୋଗ।
ଦିନ ଆଉ ରାତି
ସତ୍ୟ ସାକ୍ଷୀ ଉଭୟ।
ମୁଁ ମୋର ଜାଣେ
କୋଉଠି ବି ନାଇଁ
କିଛି ବି ଅଧିକ।
ଆଉ ଜାଣେ ତତ୍ତ୍ୱତଃ
ସବୁ ଦିବ୍ୟ।
ତପୋବନ, ଟିଟିଲାଗଡ, ବଲାଙ୍ଗିର
24/4/2019 - କୋଲକାତା
This poem has not been translated into any other language yet.
I would like to translate this poem
Love, the essence of everything