Kambe Ngakuqomisa? Poem by Sizwe A Zungu

Ngikhumbuze kwakunini,
Uzongixolela wethu ngamay' impundu, zinokungeqa
Kwakunini tana, unginik' ucu?
Kwakuphakathi nezinzulu zobusuku, emaphusheni?
Ngitshele kwakunini, lapho
Mhlayimbe ngangimahasoni, obamaganu bheka,
Phela maningi namathizethize kweleNgabade.

Kambe ngaluzuza nin' ucu lwakho,
Nakh' umamatheka ungithopha ngezibongo,
Nakhu ungifukamela, ngamabedlana akho
Ngikhumbuze kwakunini?
Nakhu sengisisitheka nothando lwakho
Nasebusuku phakathi kwamabili,
Lungivusa lungiklabalesele
Wundendende isibili.

Kambe ngakushela nini,
Nami ngiphaphame sesisengadini yezimbali,
Isixhaka socikicane bexhakene
Bengithi wubala, gwiqiqi isinene nebheshu
Ngazifaka kwaNombiliyela ihlane lothando
Gwiqiqi usana lwenkohliso, senginguyise kaSazovela
Ngitshele ngakuqomisa ngelithini?