Gisamok ikaw sa mga gumonhap
Nga namugna sa imong kinabuhi
Buot kang mobarog ug mosinggit
Aron ipahungaw ang pagbating
Gilukopan sa mga tigmo.
Adunay pangandoy nga napakyas-
Kaugalingon lisod nga modawat
Kay hugot ug lig-on ang pagtuo
Nga makab-ot ang mga tinguha
Human sa kapid-an ka tuig nga damgo.
Karon udtong tutok na sa kinabuhi
Ug mahanduraw mo ang binuhatan
Sa panahon sa imong kabuntagon
May kasaypanan ka bang nabuhat
Nga wa mo man makab-ot
Ang katumanan sa imong pangandoy?
Usahay ang kakabos kayugtan
Ug maoy tunok sa mga tinguha
Apan sa paglawig mo sa kinabuhi
Wala ka bay nahikalimtan –
Tumong? Pag-antos? Panignkamot?
Angay bang buyboyon ang kagahapon?
Angay bang pakasad-on nga ikaw kabos?
Sa imo bang pag-usik sa panahon
Aron lamang basolan karon?
This poem has not been translated into any other language yet.
I would like to translate this poem