Woro Ber Poem by ojok phillips awany

Nen an abedo Ojok
Wod palami
Lakwa Abuneri wod pa Waji
An okeyo pabit
An a wod twon
Maa onywala ka okwera ki deyo pa acoli
An a mwoco mac!
Maa mwoco oryang!
Kulu, an pe abwoli
An pe ki temo cwinya
Jok gang pa min mo pe maka
Pien an a wod pa jok
Ada, lok ada pe gengo meyo
Ada lit, ento ada gonyi
Maa ezeria Angee yang owaca…
Ni woda…nen ka kwir opongo dwoni
Wac woko
Ka lok opongo adami, pe I lwo
Lalworo odok I mine
Wac woko
Dano pe too ki lok calo twol ma too ki kwir pong june ni
Ma I kano I cwinyi ene aye obi neki
Keta kec, lyono lagopa
Lewic bi weko I camo awola
Lacac pe lony
Nen dako nywal ki wadi
Lagada yill ki wadi
Otwong wile
Gang pa lakun pe pong
Dok lajok bino ma wat
Gin ma I cwalo woko pe neki
Maa I gwoko I col piny aye bi cwali I bur
Owek a wac me kakara tin
Diki ce gwok pe ruu na piny
Lapoya pe nyero apoya pa lawede
Lacan lonyo ne ni yee
Lalonyo cane gen

Maa owaca ni,
Woda nen…
Piny ma runi loke
Tin megi, diki mega
Woda nen…pa wat omero
Remo pek loyo pii
Twora ma kwo loyo ma otoo
Latin ma lapele tur I bad dero
Ojuk kwe ceto ki cet I ot pa maro ne
Opuk ma lacoo ki neno I mac
Latek oo keng wii ogwang ma otwor
Bed lawiny lok, ci diki ki bi winyo loki bene
Yee ki ori, ci diki in bene I oro dano bene
Dwok maber I kom marac, anyim col
Kaka onywali, wek diki I nywal kaka bene
Caro rac, weko I butu ki meni
Mii woro, wek I nong woro
Pe I caa gin makwo
Pien anyim pen gene
Woro ber…

Nyig yat ma mit ki neno ki lakidi itere
Man nyig lok me kwo…
Ket I angit…ci diki maca konyi I kwo
Man nyig lok ma maa okwana…woro ber.

Arwot ki ot ta
Cwinya aye rwota
A cung ki tyena acel calo wir ot
Tin kade kwon deya, ladong kora nga?
Lati ot ma yam acayo, tin pire dong tek
Kade adong bwul, anga ma bino?
Angee tin dong adola pong tyene
Maa! Kwo kata pat kin go ma yam atamo
Twora megi, iling gidi mot.
Man mega?
Awite awita…ka lak ka yenyo kwo
Wadi macon konya tin gu ol woko
Lurem ma yam lwonga ni… omera!
Tin pe I neno wa acell mo…
Dok kwene?
Yata riya ni odugu pek do rwoda?
Maa! Kono yam awiny tami…
Man dong angee tyene lit
A cace acaja calo la dobo
Pinye tin oruu I koma en…
Woro…kono onongo angee ni I ber?
Kono onongo agwoki calo tong gweno
Man tin adok kwene?
Angee dong tyene lit en!