X-Mass Gift Poem by Yohanes Jemaneh

ጌታ ሆይ!
የሰው ልጅን ሥቃይ ድካም እንግልቱን
በሕይወት ስንክሳር ባክኖ መታከቱን
በሳጥናኤል ሸክም ጫንቃው መጎዳቱን
እጅግ መመረሩን ዐይተህ፡ ተገንዝበህ
የልቡን ተረድተህ
ሥቃዩን ልትሽር፡ ድካሙን ልቀንስ
ሸክም የጎዳውን ጫንቃውን ልታድስ
የሰይጣንን ትብትብ ውሉን ልትሰርዝ
ደብዳቤውን ልትቀድ፡ ትንቢትህ ሊፈጸም
ቃልም ሥጋ ሊሆን ፀሐይ ልትወጣ
ዙፋንህን ትተህ ወደ ዓለም ስትመጣ
አንድ ቃል ነበረኝ፡
በሕገ - ልቦናም በሕገ - ዖሪት
በሐዲስ ኪዳን ቢሆን ባዲሱ ምሪት
ሳመልክህ እንደኖርሁ በጾም በጸሎት
ትልቅ ተስፋ ነበር የልቤ ምኞት
የመንፈስ አምላኬን በሥጋ ማየት፤
አቤቱ ጌታ ሆይ፡
ተስፋዬ እንዲሰምር ምኞቴ እንዲፈጸም
መዝሙር ሲያስተጋባ ከዚያች ቅድስት አገር ከዚያች ቤተልሔም
ፈቅደህ ቢሆን ኖሮ አንተን እንድጎበኝ
ያኔ ስትወለድ ከጎንህ እንድገኝ
ምነው ከእረኞቹ አንዱን ባደረግኸኝ፡፡

መ ል ካ ም ገ ና!