Zz Purushaartha (Oriya) Poem by Dr Tapan Kumar Pradhan

ପୁରୁଷାର୍ଥ

ତୁମେ ଭାବ ଜୀବନଟା ସଫଳ ହୋଇଗଲା –
ବାଡିରେ ଧଳା ଆମ୍ବାସାଡର
ବର୍ଷକୁ ଯୋଡାଏ ପିକନିକ୍
ବୈଶାଖରେ କାଠମାଣ୍ଡୁ
ତିନି ତିନିଟା ପ୍ରମୋଶନ୍, ପୁଅ ଯୋଡାକୁ କନଭେଣ୍ଟ୍
ଝିଅଟାକୁ ଶାସ୍ତ୍ରୀୟ, କରାଟେ, ଓଡିଶୀ
ଆଉ କ’ଣ –
.......... ବାସ୍ – ସଫଳ ହୋଇଗଲା!

ତୁମେ ଭାବ, ଜୀବନରେ ଶାନ୍ତି ଆସିଗଲା –
ନିଜ ପୋଖରୀରୁ ମାଛ, ମାସକୁ ତାଡାଏ ପେନସନ୍
ଦି’ ଦିଟା ଚାକର୍, ଗେଲ କରିବାକୁ କୁକୁର
ଟି.ଭି.ରେ ତେନ୍ଦୁଲକର, ସନ୍ଧ୍ୟାରେ କ୍ଲବ
ଦିନେ ଛଡା ଦିନେ ମନଖୋଲା ସାନ୍ଧ୍ୟ ଭ୍ରମଣ
ନିଦ ନ ହେଲେ ଯୋଡାଏ ବଟିକା, ରାତିରେ
ଲଂଗଳା ମାଈପଟାକୁ ଛାତିରେ ଜାକି
ତୁମେ ଭାବ –
............ ଆଃ, ଶାନ୍ତି ଆସିଗଲା!

ତୁମେ ଭାବ ଦାୟିତ୍ୱଟା ସରିଗଲା –
ବୁଢା ବାପା ପାଇଁ କାଶ୍ମିରୀ ଶାଲଟେ
ବୁଢୀକୁ ପୁରସ୍ତମ ଦି’ଥର, କାଶୀ
ବଦ୍ରିନାଥ ଥରେ ଥରେ
କେମ୍ପା ଭିକାରୀକୁ ଚାରିଅଣା
ଛୋଟାକୁ ଟଂକାଏ, କେବେ ଅନ୍ଧକୁ
ଦେଢ ଟଂକା ଫୋପାଡି
ତୁମେ ଭାବ –
............. ଚାଲ, ଦାୟିତ୍ୱଟା ସରିଗଲା!

ପଚିଶି ଟଂକାରେ ଉପନିଷଦଟେ କିଣି
ଅଠରଟା ଶ୍ଳୋକ ଗୀତାରୁ ଘୋଷି
ପାହାନ୍ତାରୁ ବଡ ପାଟିରେ ଗାୟତ୍ରୀ ପଢି
ପେଟରେ ପାଣି ବାଡେଇ, ମାଳା ଜପି
ଚନ୍ଦା ମୁଣ୍ଡରେ ଚନ୍ଦନ ମାଖି
ନାରାୟଣ, ନାରାୟଣ ଡାକି ଦି’ଥର
ତୁମେ ଭାବ –
............. ଯା’ ହେଉ, ମୋକ୍ଷଟା ମିଳି ଗଲା ।


- - o- -