आनज्रायलांनाय आगान गोरोबहोनो संदाननानै Poem by Dhoni Ram Narzary

डि.आर. नारजारी
Date: - 11 / 1 / 2016

गोजांबोथोरनि फुंबिलिनि दुब्रिनि सासा
थाबायबोदोंमोन गोरोबहोनानै आगान
अखाफोरजों गोदोना गोबानानै।

आंनि गुबै लामा हानथिनायाव बाहायनांनाय
आथुमसे सम खुबैहरनाय उनाव
आगाना गोमाफैनायसै दैमा मोनसे बारबोनायाव।

जानांगौ दैमानि गोख्रों गुथालफोरा बुखारनानै
दैखारलांबाय बबेबा गाथोनसिम!
आरो नङाबोला साननि देरबोनाय खुदियाफोरा
गाफले गुफले खालामनानै बेखौ हुखोमोरबाय!
आरो नङाबोला अरननि बारमोदाया
बेखौ बबेयावबा बुबथिंलांबाय जानांगौ!

आं दा
आनज्रायलांनाय आगान गोरोबहोनो संदाननानै
देहायाव दाउबफोरनि गांखं लागायदों
सिख्राबाजोनि ससम्माबो बाजाराव बायफैदों
दाउ खोवऔनि मेथायबो सोलोंबाय दं
जाहाथे आंनि खाबुगोनां जायनि थाखाय।

जेबोला आनज्रायलांनाय आगानजों गोरोबहोनानै थाबायफिनगोन
जों जोंनि आगानखौ गुबुन मोनसे आगानसिम सोलायगोन
बेयो ओरैबादि आगान
जेरै बुरलुंबुथुरा बुरलुंबुथुरनि आगानजोंल बोहैयो
दाउ खोवऔवा दाउ खोवऔनि गारांजोंल मेथाइ रोजाबो
दाउबवा दाउबयैनो दं।

बै समनिफ्रायनो बे आगाना
ओरैबादि लामाजों आवगायलांगोन
जयखलं गेटनि सिंसिं
हाथरखि रायजोनि गेजेर गेजेर।
बेव जोंल आं आरो आखाफोर
लोगोसे जोंनि देंखो गोरोबनाय खबाम
आरो खबामनि खबामफोर उनफारसे।