The Thunderbolt Carline/ Cailleach-Beathrach Poem by Sheena Blackhall

She bedd at the Slocks of Carvie
Nor' Wast o Morven Hill
A giantess o a wumman
A witch wi a witch's skill

An the notion cam tae the carline
That the Don should jyne the Dee
Sae she opened her mou and she snappit
Wi the force o ninety three

Bit her teeth wir auld an shoogily
An brukk wi the force o the chaw
An her teeth drapped oot like boulders
That still powk through the snaa

An whyles at nicht in the gloamin
In the win ye'll hear the blaw
O the carline sookin her supper
Fur she his nae teeth ava