गोलोन्दांनि हांमा Poem by Ronjoy Brahma

बोराय बैसोआ आंखौ गोबा फैबाय,
जायखौ जिउनि सुथुर होनना
सानसे आं सान्दोँमोन,
थारैनो आं जेनबाय।
जिउनि बेलासियाव गोजांस्रिउदोँ
जम राजाखौ बांसिनै गिदै,
अब्लाबो आं मेसेबना थाबाय।
आं गोसो खाङो-
रोजा रोजा दुखु थाबाय,
जिउआव हांमा थाबाय।
खोन्दो मोनसे सम थेलाजोँ,
खोन्दो मोनसे सम रिक्साजोँ,
खोन्दो मोनसे सम अट'जोँ,
मिनि खुसियैनो आं संसार सालायबाय,
फिसा-फिसौ फोरोँबाय।
नाथाय हांमा थाबाय आंहा-
गाड़ि-मटर सालायनो,
बिरखं, जाहाज गाखोनो;
हांमा थाबाय आं-
स्कुल कलेज फरायनो,
गेदेमा सानसुमै जानो,
गोरोँ गियानि सिनायथि होनो,
आं थैलांनोसै-
आंनि जेबो थालांनाय नंलिया!
आंनि सिनायथियानो सेवगारलांनोसै!
सोरबाफोर लिरगिरिया लिरोबा हामगौ!
लिरोबा हामगौ हामगौ सानो आं!
आंनि जिउमिन फरायसा रायजो राजाफ्रा
फरायबा हामगौ हामगौ!
हे गसाइ! सोरबा लिरोबा लिरथोँ-
'गोलोन्दांनि हांमा' मुंङै
फोरमायगोन आं गावनि हांमाखौ।