सियालनि हाबायाव दान्दिसे Poem by Ronjoy Brahma

दैजां बोथोर।जिरि जिरि बोहैबोदोँ दै
मावरिया हाजोनिफ्राय-
आफानि दुब्लियाव लोमसाव फैदोँ।
गायनाय फुनाय बोथोर
बयबो मुखुब मावनाय दांनायाव।
नैबे आफानि फैलाव दुब्लियाव
आं, आय-आफा आरो आब'
बयबो मुखुब गोसो होनायाव।
आलि खोनायखौ दोनथ'नानै
जानजियाव आखाय सुंनानै
आं नायहरो-
गोसो होहाबना हालेवनाय आफानि
गंस्रो गंस्रो बिसन फुनाय आयनि
बिसन फुनाय आब'नि।
आं नुयो आय आरो आब'नि
ब्रुद ब्रुद मोसौ गांसो जानायबादि
बिसन फुनाय,
साल्थाब साल्थाब आफा दावदैयाव
हाब्रु सेलेखा बुस्रिनाय।
बे समाव आं गोमोहाबो
आसारनि सान्दुंजोँ गोलोमदै गसरनाय
थरथिँ थरथिँ आंनि सोलेरनि,
बयबो गोसो हाबदोँ
खानस्रि ससमा खनजाफैनाय
दाउस्रि फालोसे,
बैग्रि बिफांआव बानाय
दाउथु जरासे,
आलि गाग्लिनो फैनाय
न'आवनि सैमा मासे,
बिफां-लाइफां दैसा जाम्फै
दुब्लि हाग्रा गांसोफोरा।
बिसोरबो मोसाफैदोँ खुसियाव
सोर्गोनिफ्राय बाज्रुम बाज्रुम
अखा जानानै मिनिस्लु मिनिस्लु,
सान सिखोलायाबो जारौ मिनिस्लु हरदोँ।
गावरेमाया मेथाइ खन्दोँ
फानफेवालि दाउआ मुसुरदाव हरदोँ
हाबाब दैज्लां, मा इसे समायना!
जेरैबो जेरावबो गायनाय फुनाय
खोल खोल बैसुमुथिनि बिखायाव
दै दै जेरावबो दै,
जेरैबो नुहरो सोमखोर मिथिँगा।