आबौ थख्ला Poem by Ronjoy Brahma

' बबाव गोमालांखो गोदोनि दिना-
बहा गोमालांखो नोँबो सना-'
बे मोनसे आबौनि ट्रेजिडी
आबौआ गारां हगारदोंमोन।
थरथिँ थरथिँ थरथिँनैसो मोदै
रानज्रिँ मेसेब सेब मेगननिफ्राय
गसरबोदोँमोन दै।
अन्थाइ बिखा अबंलावरिया
आंनि सुखु दुखु बियो बुजिया
आय' संसारा बालाबोथिया
थैलांबाय आंनि अनजालिया!
बैसागु नोँ नोँ नोँ-
नोँबो आंखौ सोगाबो
आंखौ गोसोखांनो होयो दाबो।
अनजालि! नोँ दा सोरनि रायजोआव-
रामनि अजय्दायाव?
ना राबणनि लंकायाव?
नोँखौ नागिरो आं सना
रैसुमै दुखुनि सेर्जा हुना
खना खना हाजो हायेन
जोमै जोमै बिरद' बाद'।
नुवाखै सना नोँखौ एडेन गार्डेनाव,
सोरबा हौवाजोँ बेरायनाय।
नुवाखै संकस सडियानि सेर सेर
नेपालनि मेचि दैसानि सेर सेर
आलो गोजोन सोरबा-
जोहोलावजोँ संसार जानाय।
अनजालि! नोँ आंखौ गारना थांमारदोँ-
गारना थांदोँब्ला बहा थाहैखो?
लण्डन-बिजिँ-निउ यर्क ना
खोला आप्रिका खोला करियाआवसो,
ना मुम्बाइ कलकातानि बहाबा खनायाव?
अन्थाइ बिखा अबंलावरिया
हार्सिँङै गावल' अमृतखौ जाबाय,
आंनि अनजालिखौ बियो फोथैबाय;
नै आंखौबो मानो फोथैदिया?
नङा नङा आंनि अनजालिया
खारखोमादोँसो,
बियो आंखौ आनजाद नायदोँसो।
नागिरबायो आं दैज्लांनि दुब्लियाव
जानो हागौ बियो-
माय गायफाबायदोँसो सोम्बारि रम्बासि मोनजोँ,
हाब्रु सारलायदोँ खोमा
बुदां माहाजोननि हाल जांख्रायावसो।
नाथाय गैया गैया नुहरा,
दुब्लि गेजेरनि सुमलि बिफांआव गाखोना
आजलं आजलं नायहरबाबो।
हे अनजालि! नोँ बहा दं?
नागिरबायो आं सेर्जा हुयै हुयै,
आरो सना अनजालि रजे-
नागिरबाय थागोन आं अरायसम
दुखुनि देँखो हगारनानै-
ग'ग' गगलिँ ग'
दैज्लां-मेसेँ बिरद' बाद'।