आंखौ खांनानै फेदेरना गेदेर खालामबाय
साननि सोरगिदिँ गिदिँग्रा बखालि बुहुमा,
आं आंनि मिनिनायखौ बिदिन्थानि गोरबोby खुबैद्लायो
आरो खारनोल' रोँगौ जेबो उदायै समा।
गांखं फुवारनानै बिरबायो आंनि मिनिनाय
आबादनि मोदोमनाय सा-सा रैसुमै बारबादि
सना सान बिलाइनि गोजोन रोदाबादि
गोजाननिफ्राइ गोबा फैबाय बोहैथि मेथाइ।
आसुं-आबुं सानखान्थिनि आनजादसालियाव
बिनायसाफोरा खुगायाव अरथिँना रेबगनखौ बुरखायो
गोमाबाय गोदान सेरफां बाज्रुमफैनानै बैसोआ,
बेफोरखौ गोसोखाङोब्ला अख्रांआ मोखांआव नांथाफैयो।
खन्थाइनि सानस्रिया लैथोमाबादि बाज्लाखाङो
गेदेमाफोरा हब्रा हब्रा थाबायलाङो गाद्लिनाजासे
मिजिँखौ होयो आरो लायो सिगांफारसे
बेबादिनो साना फायखन्नानै लायो हर।
सिमांनि इनजुराव सैनानै दोन्नाय आयनायाव
आं आंनि मिनिनायखौ नायबाय थायो
आरो फुनद्लानानै होयो अख्रांखौ बामख्रबनानै,
बियो गस्लाबादि जायखौ गान्नानै गोसोआ गोजोन्नाय मोनो।
फिथाइआ बिबार फाइलि सोमावनानै गेवलां जानायबादि
आंनि मिनिनाया सान रोबैयाव बिलिरहैयो,
थेवबो मानोदि एसेबां लोगो दाहाया जिउनि!
नायथारनांगोन गावनि मोखां सेवथिया बुहुमनि मेगनाव।
This poem has not been translated into any other language yet.
I would like to translate this poem