बिसोरो आंखौ जंखायो Poem by Ronjoy Brahma

फ्रुद खिबु फिथ्थेँ जानानै
बन्दरनि दुंहाव लामाजोँ
हाखु-दाखु बाइकखौ साफ्रेलांदोँ
थांखियाव सौहैनो समजोँ जुजिनानै
-
एरायखा एरायखा खिबुआव सौफैगोन
लामानि बोरमा मेन्दाया लारि लारि खारस'दोँ
बिफांआव बानाय दाउस्रि मानैसोआबो फोर बिरलांदोँ
आयौ आयौ होन्नानै बिसोर
-
सोरखारनि रांखान्थिजोँ आंखौनो
आंनो दैदेनदोँ
नाथाय बिसोर आंखौ बुङो
गलामनि गोरबोजोँ फिदिँ जानाय
जाम्बा गोसोनि सासे बान्दा
बिदिब्ला आंनि बिखायाव गुसेब नामा?
-
बिसोर आंखौ जंखायो
गावसोर मेगन सानायखायनो
सोदोमस्रिनि दैबानायाव बयबो गोजावबायानो
आरोबाव आंलाय मानि एखुथा?
-
हुरुद बाइकखौ साफ्रेसिनो
मानोना आंदि बेयावनो गोजोनो
आंनि सानस्रिया जोमै जोमै बिरलाङो
एखमबा ग्रुम ग्रुम जोमैखौ सिंखावो
बिनि उनाव महर सिनायस्लाबै
-
मोसा मोसि मेगनाव एम्फौआ बारसोम फैयो
मोदै गयै मेगनाव
रेस गालांगासे मोदैनि रानथाबनाय
-
बिसोर आंखौ जंखायो
हाद्रि जाबाय लामाया हाद्रि होन्ना
गावसोर देलाय देलाय थाबायनो
नाथाय समजोँ लोगोसे नङा
समनि सिगां सिगां आं
बेयावनोथ' सेथि देरहानाय?
-
थेवबो आंनि जुजियारि गोरबोखौ
बिसोर अलसियानि सानमारो
थिफुद्ला ला होन्ना जंखायो
बेखायनो आं दांग्रोमदोँ
आं अलसिया जामारबाय नामा? ?