दाउज्ला गेसेरदोँ Poem by Ronjoy Brahma

गावखौ लानानै गाव गोथाङैनो दङ'ब्लाबो
गोथैबादि हारा गैयै
उन्दुसोनानै गोबां सम थांहोबाय
हर आरो हर
खोमसि आरो खोमसि
-
गोदो गोदो गोग्लैसोना
रंगिना-संगिना बायदि सिमां
बिबारनि बागानाव गिदिँ गिदिँ
बिबारनि सिरिनायखौनो नायनांबाय
-
दिनै गाग्लि जानाय दुब्रिया
थरथिँसेल' गोगो निहोरजोँ सिरिमोन्नायबादि
सोरांसि सोरांसि दाउज्ला गेसेरनायजोँ
बिसोर सुथि मोनखांदोँ
-
बेर्ला-बेर्था सिखारदोँ
बाथौ सिजौ गुदियाव फोजोँदोँ आलारि
बिसोर दिनै सिमांनि मोकथांखौ
मोकथांआव मोकथां लाबोथारगोन।