अनजालि-
-ओरै
हरै-
जेरैबो नायहराखै नोँ
मा नुहरदोँ अनजालि नोँ?
आंनि मोखां एबा गान्नायावसो
माबा मैला नांबाय नामा?
-
जारौरौ फावदुर खावलाय
बेस्रां बेस्रां मेगन
थमेन्नाय जारेँ गन्थं
हसारनाय समायना खानायखौ
फाफ्लियाव लामनानै
जंजिद खौखाब आखायजोँ सुंनानै
-
मा नागिरदोँ ओइ नोङो
जेबो नुवा, आंखौल' नोङो
मा नागिरदोँ सानबोलावरियाव?
-
नार्जी प्रपेसारा लेक्सार मारिदोँ
गुदु गादा सानस्रि फोरमायदोँ
फिनसिल गंसेजोँ सिलदाव थुयै थुयै
-
खेबसे खेबनै नोँखौ नायहरदोँ आंबो
मनालिसानि नोँनि मिनिनाय
बुजिनो हाया नोँनि-
मेगनजोँ मेगन मेगन सौग्रावब्लाबो
एसेबो मेसेबा नोँ
-
खोरखि गुदियाव गसंनाय
सिगुन गाज्लायावबो
खौऔआ खेबनैसो रोजाबफैदोँ
अब्लाबो-
नोङो आंखौल' नुयो, आंखौल'
-
अनजालि-
मोजां मोन्दोँ होन्नानै
आंनियावनो गासैखौबो मोनजोबथारगोन दासान नोँ
आं गियो सना
जिनिर गैयै नोँनि खावलायाव
नार्जी प्रपेसारनि फिनसिलनि
थाब थाब दागो नांफैब्ला! !
This poem has not been translated into any other language yet.
I would like to translate this poem