हे आबादारि बिग्रायदो Poem by Ronjoy Brahma

हाद्रि बिरना जोमैजोँ
अख्रांआ गुबुंले जाबाय
फोथारनि दंनाय आबादआ
गोसोम गुदुं निहोरजोँ रानज्रिँबाय
-
आं आबादारि मुलुगनि
मिथिँगानि महरगिरि
बिग्रायारि आं गोदान मुलुगनि
लांसुनिया गोसोम गोसोनि
-
दुलाराय आबादनि थाखाय
नांगौ बार मोजां
दै अखा गोगो निहोर बिदुं
-
हे आबादारि लोगो
नोँसोर बिग्रायदो खराननि हेँथायै
बेँफोर बार मोदाय हाद्रि
दाउखा जोमैनि हेँथायै
-
नांगोल-जुंगालाव गुनजेर अरोब्ला
संग्राय-सान्द्रियाव अर नाङोब्ला
जोँनि गामसा-दखनायाबो गुगालांगोन
खबाम गैयाब्ला खाम सिफुंनि माजोँ थाबायनो?
-
दैज्लांखौ ओरैनो दा हगार
मेसेँखौबो दा हगार बेबादिनो
दै हो हासार हो आबादआव
हे आबादारि जांख्रिखांदो
-
जोँ जोँनि आबादखौ सुनायनांगोन
लैथोनिफ्राय बोखांनाय हिराजोँ
अखाफोरनिफ्राय लाबोनाय सनाजोँ
जोँ आबादनि बेसेन दिहुननांगोन
हे आबादारि मोदैखौ हुगार
-
जोँहा गोरबो गोथार दं
बिखा दं जोबोद गुवार
हाद्रि दा फोनां आबादआव
लोमनो दाहो बेखौ
देरनो हो जौनो हो
-
गुबुंले गोसोम अख्रांआव
अखाफोरा जोँखौ नुहरा
ना जोँ अखाफोरखौ नुहरा
बेँफोर गोनां साननि सोरांआव
जोँ हाथर्खिखौ
ना हाथर्खिया जोँखौ नुहरा
हे लोगोफोर मिथिगौना
-
जोँनि आबादखौ गाग्लिनाय
इनाय-अनागारिनि हेँथायै
लांसुनिया बिखा जाग्राफोरनि
गोसोम गियाननि हेँथायै
हे आबादारि बिग्रायदो!