खुवालै, खुवा खुदोँ Poem by Ronjoy Brahma

द्रां द्रां द्रिँ थ्रिँ ट्रां ट्रां
जोँनि थिँ उखुमाव
अखाजोँ एंखुर महरनि बर'पनि फिथर
हायै बाज्लयै गलियै गलियै
मिनियै रंजायै गोमोरलांबाय
-
दिनैनि गुसु मिलौहाब बारजोँ
रोमै रोमै बिरबोना पुषनि खुवा
सेर सेर न'नि लांगोना लांगोना
समायना समायना बेँदिँ फैदोँ सारिगिदिँ
-
सिलानि थरथिँ थरथिँङै जमा जानायनि
आयना महरनि दैस्लुंआव
दाउसा जुब्राया गावखौ नायदोँ
मायब्रा सिथाबनाय फेर्जाँ गांखं
-
लानजाइ गैयै सैमा बान्दाया
बष्टा नागिरदोँ खामसालि खामसालि
गाबहां जानाय जिगाब मोनैनि दिखार
-
हाथफ्ला गोरान अरदाब खना खना
मावजि गिन्द्रिया एम बदोँ
जानोहागौ दुब्लिनि मोसौ फालोआ थोर थोर
-
खुवालै खुवा खुदोँ
औवा मुरा दंफां मुरा
गय दनायखं मायब्रा मायसालि जिगाब
सियै सियै गिसि जाजोबथारबाय
-
थोर थोर मावदोँ खौखाब
गोजां गाहोनो हालिया जुथा मुजा
होखारनो हाथारलिया गुसु सिमा बुरै जेकेट
-
गोजौनिफ्राय फै गाहायनिफ्राय फै
फै गोजाननिफ्राय फै खाथिनिफ्राय
माबार गोख्रै खारबोथार
दमासिलै दमासि सोलेरनि बर'पखौ होखारफै।