जामादुलि सिमां नुनोरोङै जोँनि आबैया
जोँनो उन्दै समावनो गय फेग्रा दौदोँमोन
निसाबह्रा एमावनि मायब्रा अफ्रि जाहोदोँमोन
जेबो मिथिरोङै जोँनि बिमायाबो
जौ संङै संङै जोँनो आहार दौदोँमोन
बेखायनो जौ फेनायबादि जोँनि गोसोनि बोलोआ
(सानबाय थायो साफा-मोनफा बायदि बायदि
नै नोँथां बड'लेण्डखौ माब्ला मोनगोन?
मोनथ'नाय नङा खोमा नंदां!
खौसे जायाब्ला माबोरै मोननो?
माबोरै खौसे जानो हाबावनोब्रा-
बर'आ एकेबारे खावनै थुब्ला जाबाय
बिनि सिगांनिखौथ' जारिमिना खिन्थायो
बर'आनो दिमासा हारि जाबाय
बर'आनो गार' आरो तिवा जाबाय
बर'आनो ककबरक आरो राभा जाबाय
दिनैबो आरोबाव जानो थांदोँ
कक्राझारी हरै गवालफारि बायदि बायदि
नै बोसोर सिगां बर' रावआ
दुलाराइ बुहुमावनो सोलियोमोननो!
नोँथांआ फोथायो ना फोथाया?
मालाय गुबुन हादोरनि अजाफोरासो मिथियो
बर'नि खुदै मुजुलानानै बोन्दोँ साग्राया
लोगो बहा मिथिनो बिसोरलाय?
नाथाय बर'फोरनि गामियाव साबेसे दायना दं?
बिसोर मिथिगौ खावरियाव दुब्रि बिलाइ जारिबानो!)
बिनिफ्रायनो जोँनि खर'आ खावसे फाग्ला
सानबाबो सानखनो हायैआवनो
रागाखौ हमथानो हायैबादि जादोँ
रागाया थिखिनियाव गाखोब्लाथाय जुदा जाबाय
नाथाय बिनिफ्रायबो बेँगुरासिन खालामबाय
जाय जोँनि हायाव बिष होना आबाद खालामो
बेखायनो आबुं उदांस्रिनि सोमावसारनाय
गेवलांसारनायनि सोमावसारनाय
बे सोमावसारनायखौ मानो नागारनो?
रायजोफोर आंनि आंगोनिबो आंगो लोगोफोर-
''बे अर जोँनाया, बे बिफ्लबआ
बे सोमावसारनाया जोँब्लावबाय
आरो जोँब्लावबाय थागोन-
जोँनि थांखिया, जोँनि दाबिया जाफुङागौमानि।''
आफाया बुंलांदोँमोन गोसोआव लाथाव खोनासंथाव
आरो आफाया रेबलांदोँमोन
फरायबा फरायबाय थाथाव बोसोन
नाथाय आफानि बोसोनखौ साबेसे फिसाया
दिनैसिम गोसोआव गो लानानै दं?
दिनै बिनिबो सोमावसारनाय नांगौ
This poem has not been translated into any other language yet.
I would like to translate this poem