अरननि गासैबो बेखौ बुजिनायसै
बियो जोबोद जाम्बा मानसिसो,
बेखायनो अरननि गासैबो बेखौ नागारनायसै
राजा होननानै सानाखिसै बिखौ।
अरनाव आलादिङा गिदिँबायनायसै बियो
हार्सिँनो रंजानायसै जाम्बा असुरा,
गिदिर बेसेबा समायना अरनाव
जायै लोङै थानायसै बियो।
सानसेखालि मैदेरजोँ हान्थुसे गासो जानाय खुसुंआ
बिखौ नुनानै बुंनायसै-
ओइ राजा आंखौ बोखां
गाबै गाबै थैथारनोसै आंलाय।
आंखौ बोखां महाराजा आय'
उखैयै उखैयै रानज्रिँथारबाय आंनि देहाया,
फाफ नांगोन महाराजा इसोर
हे आफा आंखौ बोखांथार आय'।
होनबा जाम्बा असुरा सोमोनाङासै
बियो अख्रां सायाव नायदावनायसै,
उनाव जेरैबो नुयैनि सोङासै-
हाबाब सोर जाखो नोँलाइ?
बहा दं नोङो नुआखिसै आङो
खोनादोँ आं खोनादोँ हाबाब,
दागाब दागाब बिखा गावथाव नोङो
बहा दं माबार खिन्थाहरदो।
होनबा खुसुं बोराया गोख्रैनो
गावनि मोदोमखौ सानेरनानै बुंनायसै-
नै ओरै फै महाराजा गोख्रैनो
हा सिङावसो थाबाय आंलाय।
दान्थारु मैदेरानो आय'
आंखौ गासोलांदोँ हा सिङाव,
फैदो फैदो महाराजा बोखांफैथार
फाफ नांगोन गसाइ आय'।
होनबासो जाम्बा असुरा
हाखु दाखु नागिरना नुनायसै,
जोबोद गोलाव आखाय फोलावनायसै
बोखांना होनायसै जाम्बा असुरा।
होनबासो खुसुंआ रैखा मोन्नायसै
बियो बुहुमखौ ओरैबादि नायनायसैदि,
बेसेबा समायना जाबाय बुहुमा
माब्लाबाबो नुफेरै मिथिँगा।
खुसुंआ जाम्बा असुरखौ बुंनायसै-
साबायखर थाबायलै बाहाय,
आं दिनैसो जोनोम जानानै
एसेबां मोजां बुहुमखौ नुबाय।
जाम्बा असुरा बुंनायसै-
ओइ बाहाय नोङो थैबायमोनलै,
आंसो नोँखौ रैखा खालामासै
बुं नोँनि मुङा मा मुं?
खुसुं बोराया बुंनायसै-
आंनि खुसिया ओरैबादि बारायनो हमदोँदि,
आंनि मुंआ बेवहायनो गोमाबाय
आं दुखु जाब्लासो गावखौ सिनायो।
This poem has not been translated into any other language yet.
I would like to translate this poem