आलो जाम्फैजोँ मोनसे गुथालनि उनाव
मोनसे गुथालजोँ गोगो दैया मिनिखुसियै,
बोहैलांदोँ आलो आलो खोला फारसे
बेसेबा खुसि खबाम लायै लायै।
सेरसेर बिफां आरो दैसा बोरियाव
गुफुर दाउब'नि अनजिमा गैयै फालो,
थब्ल' बिबारा थमेन थमेन बारहां बारहां जादोँ
उदां सोरां अख्रांखौ नायदावनानै।
बे समाव गान्दौला राजाया मेँनायजोँ
बांबुला जोहोलावखौ बिखुंआव लानानै बाग्लाय फैयो,
होनबा समायना जायख्लंआ दैसानिफ्राय
अख्रां फारसे खुसिजोँ आज्लङो।
गान्दौला राजाया मेँनायजोँ दै गरथसे लोङो
लोगो लोगो रायखस हानजानि अन्थाइ खुबैनाया,
ज्रयज्रय गोग्लै फैयो सेराव
गोमोथाव गिनायनि मोनसे बुब्लि।
दैसा सेरनि दाउब' फालोआ खैफोदनि इसाराजोँ
बिरलाङो हाजो मावरिया फारसे,
समायना जायख्लंआ हरखाब स्रोब गोमोरो
दैसानि मेथखा थब्ल बिबारा मेगन मेसेबो।
होनबा गान्दौला राजाया बांबुलाखौ बिखुंआव लानानै
गांखं बुब्राबना हांखुरै बिरदावो,
फालो फालो रायखसफोरा इनायै
थांगोन थखनजोँ जेसेबां हायो खुबैयो।
दाउखा जानानै होसोयो बिसोर फालो फालो
उनाव गान्दौलानि गांखंआव,
रायखसनि मोनसे गन्द्राया ओरैबादि नांनायसैदि
बिनि गांखं फारनैबो थेम बायनायसै।
बियो जोबोद गोसायै सहायनो हायैजोँ
सिगुण अरनाव गोग्लैहैनायसै,
होनबा बांबुला जोहोलावखौ बुंनायसै बियो-
जोहोलाव नोँखौ रैखा खालामनानै आं थैबाय।
थैनायनि सिगां आं जोबोद गोजोन्नाय मोनदोँ
गोसोखौ जोबोद सोरां मोनदोँ नोँनि थाखाय,
नाथाय नोँ रैखा खालामनांगोन
गासै मुलुगनि जिउ जिबिखौनो।
आंबादि बिरबायग्रा उदांस्रि हास्थायसुला
मासे गुफुर दाउब'नि गांखं,
बिखौ नोँ हाजो मावरियानि
थाख्ला दैसा सेराव लोगो मोनगोन।
रायखसनि जोलैखौ नोँ फोजोबथार नांगोन
उदांस्रि लाबोथारनांगोन नोँ जोहोलाव,
बेबादि बुंनानै बिफां सायावनो
मेमब्रायना थैनायसै गान्दौला राजाया।
This poem has not been translated into any other language yet.
I would like to translate this poem