रोँमानि रोबै रोबै Poem by Ronjoy Brahma

सिजौआरि जिउनि हान्थिनायाव
रोँमानि रोबै रोबै दोहौ,
गोजान लामानि सिगां दावबायारि आं
मिजिँखौ बिखायाव सांग्रां खालामदोँ।
आगान फोलावदोँ एभारेष्टनि थिखिनि नायदावना
गोसोनि फार गोसा गोहो लानानै,
खाफालनि रिफिनाय जेथोफोरजोँ रोन होना
सोमखे जोमैखौ बुस्रांना गोरबोनि।
आं गोदान फैसालि बोलागोन
दाबोरसे उखुन्दैखौ दबथायनानै,
हरा जेरै हर जानानै थाया,
गुदुं-गुसुजोँ बाग्राय जानाय बुहुमाव।
आं दोँसे मेथाइ रोजाबगोन
रागाखौ गावनिनो आथिँ सिङाव दोन्नानै,
दुखुआ जेरै दुखु जानानै थाया
अखा-बांखा सुज्रायनि लामा गेजेराव।
गोदान सोमखोर सोरां अख्रां
बिबारनि फाइलि गेवलां होना
आं जोथोनै लागोन सोरांखौ,
मोदोमफ्रु मोदोमनाय उदां बाराव।
राव-थुनलाइ आरो हारिमु गोबानाय
एभारेष्टनि थिखिनियाव फिरफिला बिरहोगोन,
खुगा सिनानै मेथाइ रोजाबगोन
आंगोनि बिदा-फंबायनि गारांजोँ।