अखाबो हाबाय बारबो बारलांबाय Poem by Ronjoy Brahma

दानिया अखा होनबा आं थैफ्रामलायनाय मोजांमोनो मानोना
अखाआ धोबिबादि बिफांनि बिलाइनि फिथाइनि मैला सुग्रा
लामानि हाद्रिफोरनि मिनिनायखौ लोखोमोरग्रा बियो
आरो माथो बुंबावनो आंनि गोसो सिंनि खुसिनि गांखंखौ?

बिफांनि बिलाइफोरा गांखं बुब्राबना मोसादों बार खोलोआव
थाइजौ आर गाम्बारि बिबारआ सिबायफोर मेथाइ खनदों
आबैआ बुङोमोन-थाइजौ मावलिनाय समाव बारहुंखा फैयो
गमामा बारआ फैबाय आरो थांबाय सिबथिं-सिबथा साफ्रे-सुफ्रे

अब्लाबो आंनि गोसोआ फानफेवालि दाउसिन जाबाय लोगो
बेबादि बाथ्रा बुङै बुङै दौबा बुंजासे बि रजेनि अननाय मोनगोन माब्ला?
बिखौ हास्थायै हास्थायै गोरबोआदि बेसेबां खबाम सोलायखोथाय.....
बिखौ गोसो होना नायो आं लोगोफोरनि बिखुंआव थाखोमानानै

आंनि मोदोमनाङै हाबसोना थानाय गोसो थोखोमानायआ
सयंबरनि राजखुंगुरबादि बिबारनि माला गाननो लुबैसोगारो
आंनि गोसो थोनायआ बिबार जानानै खेबसे गेवलांथाराब्ला
आं बुङो दोबैलांथों जेरै दोबैलाङो सानआ
सानफाथोलो बुहुमआव खारख्राव-खारसि खालामनानै

बिरबोना बाफैयो दाउसिन आंनि सिमां बुंफबनाय गोरबोआव
आंनि गुस्थिआव रोदोमखाङो मिनिस्लु मिनिनाय बिबारनि फाइलिबादि
नोंखौ गोसो थोखोमा गोसो थोखोमा लेब खाख्लुबना थानो हालिया
बे खेबआव बारआव गोबानानै नोंखौ नायनांगौ जाबाय