उदाङै बिरनाय दाउसिनखौ हमनो हास्थायोब्ला
गांखं थुनानै बिरनो रोंनांगोन,
आखाय फोलावसेयावबो मोनाखिसै आं नोंखौ
साथा-माथा बिरलांबाय नों जोमै एबा फागुन जानानै।
बिमाया हाथाइनिफ्राइ मेथाय लाबोगोनखौ नेनानै थानाय हांखुर गथ'बादि
नेनानै थायो आं मोनसे सम जोबोद खुसिनि,
जाय समाव लैथोनि नाफोरा मारुंआव बिरखोनानै मोसागोन
गावनिनो खाफाल फाथिनानै
खाफालनि मैलाखौ फुनानै लागोन दैखरनि दैजों
आंनि बिखा आरो आथिं आरो आखायआव
लोमजानायनि गर्दन गोग्लैनायखौ अर्जुनमोनबादि फोजोबगोन।
आंनि मेथाया जुथेयै गुस्थियाव बाब्राबो
बुजिनो रोंथारै राजानि फायखिबादि दाजादे नोङो
बारजों जानसि सोमावना सालाइ फोलावग्रा थुंग्रिखौ अनफ्लेनानै
गोसोनि जाब्रबथायखौ नारथेनानै लानांगोन बिखायाव।
आंनि सानदुं नांनाय जानालाआव
बियो आखाय बिलिरफैयो सिरि सिरि,
आंनि मोखांआवसो जेन बिमाबादि बिलिरदों बेबादि मोनदाङो
आं जायो सोरखिआव थुनखांजानाय खुन्दुंबादि
दुब्लिनि गावनाय हाखौ अखाया सुथेनायबादि
नों आंनि लोमजानानैखौ लानानै थांफै
निहिर सिजानानै हरखौ सहायनोहायै दाउसिनबादि
गोसोम अन्थाइनि खर'आव गसंना नोंखौ नायहरो आं
आं बुङो नोंनि आथिंखौ सिबाआव गोबानानै लागोन
आं जागोन गोजां बोथोराव निहिरजों दुगैनाय गांसोबादि समायना
This poem has not been translated into any other language yet.
I would like to translate this poem