माब्लाबा नङा माब्लाबा Poem by Ronjoy Brahma

जेरावबो अबंआ दं होनबा फाफ नांगोन
सोर्गो-मोर्थो नागिरबाय आं बिखौ
बाकसु सिंनि खाखोर बिलाइ बिलाइ
उरि अरनाय सिलिँनि खाखोर बिलाइ बिलाइ
जेरावबो अबंआ दं होनबा फाफ नांगोन
उरां-फारां बिरबायनाय जोमैया आंजोँ रायज्लाया
मोदोमफ्रु मोदोमनाय बिबारा रायज्लाया
गोमो-गोथां अदेबानि ब्राब्रा हमथाथारब्लाबो
गोदै सिमांनि सावगारिया थाबाय थाया
बेखायनो आं फोथायसिनबावबाय
जेरावबो अबंआ दं होनबा फाफ नांगोन
मानोना सोर्गो गिदिँ गिदिँ आं नुबाय
सोर्गोआव अबंआ गैया
उदै बेरगावहां बेरगावहां जालायनाय रंजानायाव
आं नागिरबाय अबंआ गैया
अनजालिनि खबाम गैयै मिनिनायाव
आं नागिरबाय अबंआ गैया
मोर्थो होन्नाय खनासे फावथिनायाव अबंआ दं
दाहा गोबानाय आयनि गाबनायाव अबंआ दं
अखा खोरोमनायनि रोदा रोदा अबं
दुखारुनि मोदै मोदै गोजोमना थायो अबं
माब्लाबा नङा माब्लाबा बियो आंजोँ सौग्रावो
बियो खारो आरो आं होसोयो
जोबोद गिख' बियो खारबाय थायो