आंनि सिलाया बैसुमुथिनिनो
गेजेर समायना बिखायाव,
गोबाव बोसोर सिगां
थेला नारै, खादा रुजुनै
गासो गासो आफायानो खोखादोँ ।
जुब जुब अखा हायोब्ला जायो
गावनो गुरै लेफे
आरो बाराबा जायो
बेन बेन हाब्रु,
थिँ थिँ गोसा सान्दुंआ दुङोब्ला
जायो गावनो गाव हाद्रि
आरो बाराबा जायो
बेरलाब बेरलाब खामसाव ।
बोसोरसे थांबाय
बोसोरनै बारलांबाय
आरो गोबां बोसोर जाबाय
दिनै हाब्रु दैज्लांनि बोथोराव
मै होनायबायदि स्लिम स्लिम
नुआ आगान आंनिखौ रावबो
दिनै बादामालि खानाय
आंनि सिलायाव ।
बिबायारि जाखो ना?
नङाबा सासे सिखावनि जाखो?
नङा नङा आं गोरिब
बिबायारिया आंनाव खिन्दासे मायरं मोनलाङा
सिखावआ आंनाव दाउ-अमा मासे मोनलाङा
बेसोरलाय मानो फैनो?
दैज्लांनि बोथोराव सिखावआ गाना जुथा
दै बानायाव लाय बिबायारिया.....?
नङा नङा, सिखावआ गोबां
ब्रे ब्रे जुथा आगान थालां थारदोँ
माखासे मानि गोबां
थालिर बिगुर
बिरि आरो सिगारेड खान्दा
आरोबाव
दाबो सादा थांखुनि
थेमा फ्लाष्टिकफोरा
सेवलां थाराखै ।
ना आलु माहाजोननि दाहोनायासो...
नङा नङा बेलाय
रुवाथि फोरखौसो....
ना थिबथं हालमाजियासो
जालायनाय सेँग्रा-सिख्लानि
खबर होफैनो
फैग्रां बायदोँमोन ।
मेसेँ बोथोरब्ला आफाखि थालांगौमोन
अब्लाथ' सैमा खालुआबो
गन्थं फोलाव फोलाव
मोनामसुनो हागौमोन,
अखाबो हादोँमोन ज्राम ज्राम
आफाखि मानि सुस्र जादोँ ।
सोरांस्लाब मोनै आफाया हाल हुरनदोँ
ना बेसो थांलाय-फैलाय...
नङा नङा बिदिब्ला
रोखा रोखा आसि बिमाया
जाखार थारगौमोन
नङा नङा, सिखावआ गोबां
ब्रे ब्रे आगान थालां थारदोँ
माखासे मानि गोबां
थालिर बिगुर
बिरि सिगारेड खान्दा
आरोबाव
दाबो सादा थांखुनि
थेमा फ्लाष्टिकआ
सेवलां थाराखै ।
This poem has not been translated into any other language yet.
I would like to translate this poem