निजोम फोथारनि बिखायाव
नांला बंसा रायज्लायै सावरायो,
माबा मोनफ्लांना बाथ्रायाव
हाजि हाजि मिनिग्लाबो ।
सिरि सिरि थाम्फैया देहायाव
खोनासंखोमादोँ सिरि,
माफा मानैया बिँ बिँ सोदोबजोँ
हाजेव हाजेव मिनिफादोँ ।
गोजा जारांङैनो मिथिस्लाब मोनै
गावखौ सिखोमादोँसै खोमसियै,
सानजा फैसालियाव दिन्दाङै
अखाफोर गावदां फावदुर खावलायजोँ
नायहरखोमादोँ जोँफोरखौ ।
दाखासे गाम्बारि बागाना जेब्लाबो
थं गसंथेदोँ गोजौयै,
आज्लंना नायहरदोँ थेवबोनो
खावसे मोखाङै अखाफोर गावदांआ ।
साया गोग्लैनाय खोमसि दाखा
माफा मानै एम्बुआ खोनासंखोमादोँ,
हांखुर जाना माखासेया
दमकल सेरनि दैस्लुंआव सोदोब
जब्ब' जब्ब' गासोमलाय गाखोलाय ।
गय फाथैनि बारियाव गोमफबनाय
गोमोथिँ खुसेँग्राफोरा मिनिहरदोँ
लामानि लेवा बेन्दोँआव गुमाफ्रा बोर बोर ।
This poem has not been translated into any other language yet.
I would like to translate this poem