सोरनि गोसोआ फानफेवालि नंगौ सोरनिआ नङा?
सोरनि खुगाआ गान्दा गागेब नंगौ सोरनिआ नङा?
फुरा-फुरि आं दा मिथियै नंलिया दे लोगो
बाथ्राफोरखौ आं आरो मोसौ गांसो जानायबादि बुंलिया
आदार मोनजायै अमानि खुद्रिनायबादि खुद्रियो आं
माबा मोनसे बुंनो। लैथोनि ना बादि एखेबारे सिरियै
जेंनाल' नंलिया आं गोबां दावहाखौनो लोगो मोनबोबाय
एखमबा उखुन्दैआव मोखांआ सोमखे जाबाय
थेवबो दैसानि बोहैनायखौ खोनायै जाफेराखै
मोखांखौ जेसेबां हांगार नांदों एसेबांनो सुनानै लादों आं
बेबादिनो आंनि मोखां आरो आंनि गोसोनि मोखां गोबां सोलायबाय
आङोना दाउ खानजंबादि आदार खनजानो लुबैयो
थै बादि नोंदि आंनि रोदा मोनफ्रोम आजां-गाजां बोहैनो हमबाय
नोंनि थाखाय आंदि बेसेबांबा हाजो नोगोर नामदानिआव रोजाब्बाय
लामानि हाद्रि बाला आंखौ बेसेबांबा खुलुमबाय
सानदुं-अखाआव मेंनाय गाबनाय नुनानैबो आंखौ नुदिया नों
खेबसेल' आंनि बिखाआव अननायजों नायहर दे
नोंनि हरैजाय खुसिजों आखाय फुआर फुआर खारलांगोन
आंनि बिखाआव नोङो थाबैनो सिथाब फैयोब्ला जेबो जिंगा दासि
थांनाय हरनि मेगननि मोदैखौनो आवथिनानै सना दिहुनगोन आं
आयआ नोंखौ नेनानै दं खामसालि आगानआव
उखैहाबनाय सखाआ नेनानै दं बाख्रिनि आगानआव
बारिनि बिबारआ बारग्लांना मोसानो लुबैयो खेबसे स्राइ
अख्रांआव जोंफबनो लुबैयो हाथर्खिनि हाथर्खि सानथ्रहायै
This poem has not been translated into any other language yet.
I would like to translate this poem