गोसोथोफेरबानो मिथियो- गोसोथोनाया मा जिराद?
दुखुनि बुब्लियाव होरलां दिङा गाखोयो
बैथा हमनो रोङै लह्रायनाय गोरबो,
जलांनाय दौलें जरायफिन्नो अख्रां नायदावो।
हाबायथा नोँ हाबायथा बैसागुनि अखा
गथ'फोरा खाखोरनि खैखा दिङा जावगोन,
गांसो जानानै खिस्रायनाय मोसौआ
गांसो गोरलै नेनानै थागोन दुब्लियाव
हामख्रं आबादारिया नेनानै थायो आबादनि मोदोमनाय।
मिथिमोना दिनै बे हादोराव मानि दावराव
होँगो-दोँगो हाजो गाखोनायाव नुबाय
अन्थाइ थायसे गोग्लैबाय दुद्रुनानै,
संफ्लआव हाबसनफैयो गिनायनि दैसा बोहैनाय।
मिजिँखुलि खर'नि थिखिनियाव
नासिना रिँखांबाय गोरोबथावै खबाम मेथाइनि,
जेथो गोनां बेफोर बुब्लिया खैखा मिनियो।
मोकथांआव जिउखौ फोथांनानै लाखिग्रा
बिसोर गथ'फोरा सालाइनि आनजाद लादोँ,
गाज्रि सिमां नुनायनि हुदा दं बिसोरहा
बिसोरनि गोदान जौथाया आवलिलांबाय थायो।
समनि मोसाया गावनि आसुगुरखौ गोबौ खालामनानै
मोसाग्लां फैदोँ बेसेबा बारज्ल बारज्ल
आरो दुलुर बुहुमा गिदिँबाय थादोँ
गावनि महरखौ गले गले खोमानानै।
हाबायथा नोँ हाबायथा बैसागुनि अखा
नोँखौ नागिरनायावनो बेसेबा जोमै बारलाङो आं,
बेबायबायनानै जालाखाराव सानजोँ खामफ्रामजायो,
गोख्रोँ खालामफिनदो आं लोरबां हाराफोरखौ
This poem has not been translated into any other language yet.
I would like to translate this poem