आं मिथिगौ नोँदि आंखौ
मिथिया मादि बुंगोन,
दायो नोँ आंनि सना
बेयो आंनि गोरबोआवनो
खाब्रां खुगानि राव नङा।
नोँ इयुननि थाखाय आंनि
जाथावना?
आं मिथिया बेखौ।
नोँ सैयो, सैया
आंहा दुखु गैया,
जेब्लाबो नोँ आंनि, दा
बेखौसो बुङो गोरबोआ।
नोँ आंनि लोगो
नाथाय माब्रै?
आंनि थाखाय गोजान बेयो।
आं नोँनि सुथुर, दा
जुदि नोँ सान्दोँ, सान
आं मिथिनो नाजायाबो।
आंनि गोरबोआ हास्थायो
गावनि मुलुगआव नुलायना
आंनि मेगनाव गोग्लैबाय
अख्रांजोँ गोरोबना सान्नो लाबाय
आं नोँखौ हास्थायो।
आं मिथिगौ नोँखौ
मानोना आं मिथिगौ बेखौ
दावबायना आं गोजोनो
नोँनि गोरबोआव एब्रेना,
नोँ नुवाखै बेखौ
नोँ मोन्दां मोनाखै।
दुफावलु जोमैयाव आबुर गैया
बियो उदां बिरबायो बारजोँ,
सोर हमथा हागोन गोसोखौ
आं मिथिगौ हानाय नङा।
रोहो रोहो जोँनाय
अरा समायना
बेनि बिखुंआवनो खफ'नि मिनिनाय,
आं गोजोनो बेयावनो
दुंबुर हास्थायनाय निजोरानि।
नोँ मिथिथारा, ने?
नोँनि गोरबो सेराव बेसेदि
मानोदि आं मोसादोँ।
रमान्सनि देँखोआ गोजावो
आं खारफायो सिरि सिरि,
खोनासङै आं गोलांदोँ
सानहर बिदिनो थांदोँ।
खन्थाइनि जोबनाय गैया
नोँनि मुंखौनो सुजुयो गोबां,
हां खनसे फरायबा सुहाबो
गोजोन्नाय मोनो गोरबोआव।
आं मिथिगौ, बेखौ
नोँ रोजाबो मेथाइ, आर'जनि
गिर्जा आरो बेरायनायाव,
जोबोद समायना साजायनाय
मेल'दि देँखोआ गोजोवो
आंनि खोमायाव थाबथायो।
नोँ समायना (रैसुमै)
आरो गोदै मुं नोँनि
आरोबाव हरनि अखाफोर मोखां
रिमिन्नाय खावलाय फावदुद,
फै गोरबोआव
बिलिरगोन आं लाजिस्लुयै
जोँनाय मेगननि सिगांआव
दुंब्रुद खुदुमगोन अन्नायजोँ।
This poem has not been translated into any other language yet.
I would like to translate this poem