थिरिँ बिरिँ 1551-1600 Poem by Ronjoy Brahma

1551
बियो आंनि गोरबो
नंगौ अबंआ होदोँमोन
बेखौनो जोथोनै लादोँ आं
गियान मिथिनायाव लानानै
1552
थिँथिँ गोसा सानदुंआव
नायनो समायना दुब्लियाव
आय' गोसो होथारदोँ माय गायदोँ हालेवदोँ
1553
हाब्रुजोँ गादै लानाय
मा एसेबां बिजिर जाथाव
हालुवाया आलि खोदोँ
गंस्रोना माय गायदोँ आयजोफोर
1554
हानजासे ना गुरदोँ
हाजासे मोनदोँ मोना जुगुरुबदोँ
लांथि बुदांआ बाथा होदोँ
नायहरो आं बेखौनो
1555
बेसेबा ओँथि गोनां संसार
दैज्लां फैयो आरो थाङो
गोमोथाव सुबुंनि सोरजिया
साननि गोजोँ सोरांआव
1556
साना जौबोदोँमोन जेब्ला
नांगोल मुथि दैनानै
आं दुब्लि गेजेराव मेंरुयो
फिन आं जागायो आरोबाव
1557
दा जोबोद मुखुब बयबो
दुंहाव गुदुं बोथोर
साना गाखोदोँ हाजो थिखिनि
जिरन गैया बे समाव
1558
गोसोआ नागिरो सोलेरनि थाखाय
गोजोन गंसे जिरायसालि
सुदेम बिबारबारि
जुगे जुगे रायजो मोनसेनि
1559
अखाफोर नायनानै दिनै हराव
आं बिरलाङो खाथियाव
जोँथि माथि मिनियो आं
हाथर्खि जानानै खोमसियाव
1560
आद्रा जागोन नामा हाबाया
बिनिखायनो आं खारो
जिउ दावहानि थाखाय
हर आरो सान जेब्लाबो
1561
थैनायखौ मिथिथारा आं
नै गसाइ मानो हरो
लुबैया थैनो सान्नानै
थेवबो गसाइ नोँनि गेजेन आं
1562
समायना मुलुगनि सिङाव
आंनि आखाय फोलावनाय
बयखौबो गोबानो अराय
जेराव अख्रांखौ आवग्रिबाय आं
1563
जानायनि थाखायनो बारलाङो
बेसेबांदि सान हरा
दाहानि सम आय'
मौसुमि उदां बोथोरा
1564
साग्लोबनानै दोनो मुखुबथिया
गासै आंनि बोलोखौ
बेयावनो आखाय सोमावदोँ
हाबाखौ फोजोबनायनि थाखाय
1565
आं गाबो जेब्ला
गावनो गाव हार्सिँङै
मोदै गसरनांनाय हांमा फैयो
अब्लाबो आं रंजानो लुबैयो
1566
अनजिमा गैयै सान्नायाव
खन्थाइनि बिबार बारोब्ला
मिजिँ सुजुगोन आं
उदांस्रि थांना थानायनि थाखाय
1567
मेगन फिदिँब्ला आं नुयो
दुखुथियानि मेगन मोदै
रुजालिया बिबारजोँ
बिसोरनि अनसुलि जिउखौ
1568
थांलाय फैलाय मेगनाव
साननि रोदा गोजावबोयो
आरो आं बिरलाङो
सोमखोर समायना हाजोआव
1569
गसाइ रिफिनाय जानो लुबैयो
नोँनि मेगननि रोदानि
बेबादिनो आं जानो लुबैयो
बयखौबो गोबानो समानै
1570
आं नावखौ जावगासिनो
बे गोमोथाव लैथोमाव
आं फोरोँगासिनो गावखौनो
बेसेबा खुसियै जावनो
1571
बावजायै समायना खन्थाइगिरिनि
समायना गोरबोखौ
गोबानानै लाबाय आं
जिउ मोनसे मोकथांआव
1572
थैनि मोदोमफ्रु सिमांआ थैनाय
लांसुनिया फलाननि मिजिँआ
बेवहायनो अराय गोदोयो
बिसोर थैयो गलेगले
1573
बिसोर गोदोना सेरथेयो
मोनजारोङैनि हि फेरलेबसे बुखुयो
बिसोर मोसायो बथलनि दिँग्रियाव
बिसोर थैयो बथलाव
1574
निरासा एबा दाहानि मांखरसालियाव
सोर गेलेयो मुलुगाव
रेगा आफा उल्थानि आगानजोँ
बिसोर सिमां नुयो बांग्रिँनि
1575
गाद्लिनना बेसेबां हान्थिनो
बेसेबां सिमां दं गोरबोआव
रेवरेवा गाबो सानदुंनि थाखाय
सानदुंखौ बेसेबा मोजां मोन्नानै
1578
गाखो जायै आखिनाय
एभारेष्ट हाजोनि थिखिनि
संसारनि खामग्लिनाय आबादथिलियाव
आदार नागिरो दुखारु दाउथु
1579
मिथिगौ खारलुंनाय दानबनि खौहाय
नबथिया आरोबाव गोजावलाङो हरै
ना थेँगोनानि गोदोना सोमावनायाव
आलौओ सानाय आरो जोखोम
1580
दिनै आं उथ्रिनो हायाखिसै
आं गोरोन्थि खालामबाय
ओहो आं उथ्रिनो लुबैयाखैमोन
नाथाय आं नाजादोँमोनबो
1581
मोकथांआ सिमांबादि नङा
नाथाय आं नुयो सिमांआव मोकथां
बेसेबा गोजोन सुदेम मिथिँगाबादि
आं जेनबाय आयेननि बोलोजोँ
1582
जेन्नायखौबो गनायबाय आं
आंनि गाबनायखौ बियो खोनाया
मा एसेबां अन्थाइ बिखा होनबा
बेखायनो आं मिथिँगायारि जिब
1583
आं बिरनो लुबैयो आंबादिनो
उदां आं अनसुला आं
रंगिना संगिना मोकथांनि
हाबाब बेबादि मोकथां सोर सोरजिनो?
1584
सानजानि सुदेम बारा
सोनाबहा बारलांदोँ
दाउसिन दाउला बिफांआव मोसादोँ
मिनिसुलु आंनो गोजोन गोसोआ
1585
दैसाखौ सानस्रिदोँ दाउसिन
हरै बोरि होसोनानै
लामा गेवनाय मेथाइ
थांखि फारसे सहैनायनि
1586
आं लिरो नोँनि मुं
सोमखोर अख्रांआव
नाथाय अखा मोफ्लामना
थेरबेथेर जायो
1587
आं साननो हागौ
आंनि मिनिनायनि खबाम
मोदैनि गाबनायाव
आंनि जिउनि ओँथि
1588
आं आंनि गोरोन्थि नङा
आंनि सुथुरबो नङा आं
मानोना आंहा मिजिँ दं
आरो आं सोलोँदोँ
1589
अफ्रि मोनामनाय
आबै आबौनि गामिया
दिनैबो जायाखै सोर्गो
गैया दिनै गाखोनायनि जांख्ला
1590
मोदैया गसरबोयो मेगननि
गुसु गोजां बोथोरनि
सोरांसि सोरांसि
सुदेम फुंबिलिनि
1591
सुदेम बारा सोलेराव बिलिरो
गोरबोआव सानहोयो
रंजानायनि गांखं फुवारो
होनबा दाउसिननि मेथाइया रिँफैयो
1592
अखानि थिँ बिलिरनाय
सिरि मोनो गोरबोआ
बायजोआव ओँखारब्ला
गोबाख्रबना बिलिरो बारा
1593
गोरबोआव उसिना रंजानाय
मा जाखांदोँ मिनिनाय
फुंबिलिनि बारा बिलिरो
गोरबोआव गोदान खौरां
1594
अख्रांआव जोमै गैया होननानै
बांद्राय दुगाथारमोन आं
गानफबना फैदोँमोन थाबायनानै
गगा मोनहोबाय फिसिनानै
1595
गोजावबोदोँ फुरसब जोमै
आंनि मोखांखौ बिलिरदोँ
अख्रां नायदावनाय समाव
1596
दिनै हान्थिनाय लामायाव
जेरैबो मायनि दुब्लियाव
दाउबनि फालो
आं खुसिजोँ रंजायो
1594
अखा नोँ बिलिर फैयो
गोरान हाद्रिनि सोलेर
बिसोर गोजांस्रिउ जायो
1595
बेसे समायना दाउदै बिबार
आं गोजोनग्लायो
गुसु फुंबिलियाव
1596
मोनाबिलि समाव
खावसे अखाफोरा नुजादोँ
सोरांनि रोदाजों खारदोँ जोमै
1997
मिजिँ फारसे आं दावबायदोँ
मेथाइ रोजाब रोजाब
गुफुं जोमै जानानै
1598
आं गोसोआव बोबोदोँ
सिगां बिदिन्थानि रंजानाय
बेसेबा रंगिना बुब्लि
1599
गेरेमसा बिफांनि दालाइयाव
दाउसिन रोजाबो
दालाइ बारस्लायो गारां हगारनानै
1600
हाजोनि बोहैनाय गोजोँ दैसायाव
आंनि मेगना गोग्लैयो
गोजोमो गोसोआ
बेसेबा समायनासिन आरोबाव