दिनै आंनि आर'ज 41- 80 Poem by Ronjoy Brahma

41
नै अबं, सोरजिगिरि
गोख्रोँ नोँनि आखायजोँ
हमथा हमथा गोसोखौ
हमथा हमथा आथिँखौ
थाबायलांबा गेना लामाजोँ
नै गिरि आफा नोँबोल'
गैया रावबो गैया।
42
गोख्रोँ गोथार मोन्दांथिखौ
लाबो लाबो गिरि
लाबो लाबो गोरबोआव
फोरमायनो हानाय बायदि आं
नांनाय मोजां आफादआव
नै आफा नोँबोल' आंनि राहानि।
43
मोजां मोनहाबो आं नोँखौ
समायना समायना सोरजिखौ
नै गिरि हो बेयावनो सानसे
गोजोन आंनो सायाखौ
हो आंनो दुखु हांमाखौ।
44
नै गिरि, गेले गेले आं
सानफा मानि मेँग्लियो
नोँखौ बावगारना गोग्लैयो
गोरबोआव आफा गोरबोआव
मुंखौ दाखा लुफाव फै
नै गिरि, मख'नो आं गले गले।
45
सानफामानि मुखुबथियाव
नोँ आंजोँ थाफायो
नोँ आंजोँ मिनिफायो
नै आफा अबं थाबायथा थाबायथा
गेले गेले गोरबोआव।
46
जोँमा आं नायहरो
नोँखौ आं खुलुमो
नोँनाव आं आर'ज गाबो
लाबोबाय नोँ जोँसारनाय समायना
नै गिरि गोजोनो मिथिँगा नोँनिखौ
जोँमा आं नायहरो।
47
जोँमा आंनि अनजाथाव
आंनि मेगनाव गेङो नायना
गोरबोआ रंखाङो सानहाबना
नै जोँमा लाबोबाय नोँ लाबोबाय
खोलो खोलो बार गुसु
सानस्रि गोरबोआव बिलिरनाय।
48
थिक थिक थिक
नै गिरि मुलुगनि
समा बारलांदोँ मिनिट
समा बाबेनदोँ घन्टा
सानफा दिनै साना गोमालांदोँ
मिथिस'आ आफा नोँनिखौ
गोजोनो आं गोजोनो
सान हर नोँखौ हांख्रायना।
49
मिथि मोनस'वा आफा नोँनि
बेयो आंनिनो मेगनाव
रंजायो मिनियो दान्दिसे
गोजोमो आरोबाव मोदैजोँ
दुखु हांमायाव सानफामानि
नै गिरि मिथिगौ
नोँनि नोँनि गासैबो गोजोनो।
50
नै गिरि मानि जाथाव गोरबोनि
नोँ आंखौ दैदेनो, आफा
नोँखौ लुबैना हांख्रायो
आंनि आथिँखौ बोलाङो
नोँ होफैयो सोरां लामाखौ
अबं नोँखौ आं गंग्लायो।
51
मोजां मोनो मोजां मोनो
नोँनि गासैबो मानिखौ
नै आफा, मेगनाव गासैबो गोग्लैयो
नोँनि मानि मुहि बिलिरो
जोँमा आफा नोँखौ खुलुमो।
52
जेबो सान्नाय गैया गोरबोआव
जोँमा नोँखौ नुबोला गिबि
गिरि नोँखौ खुलुमो गोरबोआ
आर'ज गाबो आंनि गोरबोआ
नै आफा बुं बुं आंखौनोँ
अनजालु फिसा आंनि होन्नानै
जोँमा नोँखौ गाबज्रियो आं।
53
नै जोँमा, मानिजाथाव गिरि
आंनि खाफालाव आफा
आंनि खाफालाव बिलिर
मिनिस्लु मिनिना मेगनाव
नै जोँमा फै सोरां लामायाव।
54
सोरजिगिरि आफा आंनि
फैबाय फैबाय नोँ मिनिस्लु
आं नायहरो नोँखौ
लोगोआव आखाय खबजबै बिखायाव
जोँमा नोँखौ खुलुमो आं।
55
फुंनि बारा बिलिर फैयो
नोँनि मिनिनाय गोग्लैयो
आंनि मेगनाव नांफैयो
मेथाइ रिङो गोदै गोरबोआव
जोँमा रोजाबो दाउसिनफ्रा
आं खुलुमो नोँखौनो
गोथार साजायना गोरबोखौ।
56
जोँमा आं खुलुमदोँ
मिनिस्लु मिनिना मोखांआव
नायहर आफा आंखौ
बुथे बुथे सिखारनाय आं एमनिफ्राय
नायहर आफा मोखांआव
आं खुलुमो नोँखौनो।
57
उन्दुनाय एमनिफ्राय सिखारना
हरखाब गाबज्रियो नोँखौ
जोँमा रिङो गोरबोआव
मुं नोँनि आफा गिरि
गोरबोजोँ खुलुमो नोँखौ
नोँ फै होखारना लोरबांथि
साजायफै गोरबोआव सोरांखौ।
58
आंनि आर'जा जायाखै गोदै
जोँमा गाबज्रियो अब्लाबो बोहाबना
फै बे फुंआव, गिरि
गोजोनग्लाय होफै गोरबोआव
आं नायहरो नोँखौ
मैखि खाथेनाय मेगनजोँ
जोँमा आर'ज रिङो गोरबोआव।
59
दिनै गोजोन फुंआव
नोँ फैबाय आफा सोरांङै
बेरलाव मिनिस्लु मेगनै
साबायखर आफा साबायखर
नोँखौ खुलुमो गोरबोजोँ।
60
मिनिस्लु मिनिस्लु मेगन
रंजा रंजा मोखांङै
एब्रेलांबाय जोँमा नोँ फैसालियाव
समायना नुहरो मेगनाव
साबायखर होना बरायो आफा
फैबाव फैबाव मिनिस्लु मोखांङै
मोजां आंनि मेगनाव।
61
मोजां रादाब लाबोयो
थाबायो आं लामायाव
लोगोसे गोरबोआव जोँमा
आर'ज गाबो आफा
नोँखौ साबायखर होयो।
62
जोँमा आबुं ब्रह्म
नोँनो गिरि मुलुगनि
आं मिथिगौ आफा
आंजोँ लोगोआव अरायबो नोँ।
फै आफा आंनि
बुंनि आं जेब्लाबो
नोँनो आंनि, आंनो नोँनि
मोजां मोनो नोँखौ
गोरबो गोसोआव गोथारै।
63
नै आफा आंनि
दिनै आर'ज नोँखौ अख्रायै
हो आंनो मोजां सानखौ
गोजोन गोथार बारखौ
नोँखौ गंग्लायो आफा, खुलुमो।
64
साबायखर आफा नोँखौ
होबाय आंनो हान्थिनाय
सोरां सारफावना लामायाव,
समायना सान, मिथिँगा
थाबायो आं लामायाव
मिनि रंजानायजोँ खुसियाव
नै गिरि हो आंनो बोलो
थाबायलांगोन आं लामायाव
हो आंनो सोरां सारफावना।
65
जोँमा नोँखौ साबायखर
फैबाय फैबाय मोखांआव
मिनि मिनिना लामायाव
आंनि गासैबो जिउआव
अरायबो अरायबो फै जोँमा
बिलिरफै आगदा आखाय नोँनि
दाखुरा आंनि गोब्रा खाफालाव।
66
फुंबिलि सोरांबिलि
हे: परम ब्रह्म
जोँमा गुरु आफा गासैबोनि
आं रोजाबो आर'ज गोरबोआव।
67
फुंबिलि सोरां समाव
आं गंग्लायो नोँखौ खुलुमना
आं आर'ज गाबो नोँनियाव
जोँमा आफा,
नोँखौ नेयो सोरांबिलियाव
आखाय खबजबै हार्सिङै।
68
नै आफा आबुं गिरि
जोँमा परम ब्रह्म
आं मिथिगौ गावखौनो
फिसा फिसा आं नोँनि
नोँखौ खुलुमो आफा गिरि
बयनिबो आफा बिगुमा होन्नानै
जोँमा नायहर लामायाव आंखौ।
69
जोँमा नोँखौ साबायखर
मोजां मोनो नोँखौ
मोजां मोनो गोरबोआ
जेब्लाबो नागिरो नोँखौ गोरबोआ
फै समायना गाहाम सानाव
जोँमा आफा नोँखौ हांख्रायो।