जिख्लाबसे लाइजाम: 'रैसुमै'नो 813-851 Poem by Ronjoy Brahma

813
नोङो बार सुफुंहरो आंनिसिम
आरो आंखौ बिलिर फैयो नोँ,
समायना खानाय हसारनानै।
814
गुसु अखाया गोबाफैयो
अब्ला आं नोँखौनो सानो
सना बिलिरो सोलेराव जेब्ला।
815
गोथां गांसोनि बिखाव
आंनि मेगना जेब्ला नोजोराव
नोँजोँ आंजोँ सना मोनाबिलियाव।
816
जेबो जाहोन गैया
गोजोँ जोँखां फैयो जिउआव,
नोँनि मिनिखैरो सायखंआव
गोबानो नागिरो गोसोआ।
817
बे बुब्लियाव
नोँ आंनि गाबनायनि मोदैयाव
खुदुमो साया माया आंनि मेगनाव।
818
आं दाबो हमथादोँ
गोमाना थांनाय साननि बुब्लिखौ
आं बुंदोँमोन जेब्ला गोसोआव
नोँ नुगोन नोँ आं इयुनाव।
819
नोँ जेब्लाबो आंनिनो सेराव
साजाय आंखौ गोदै मिनिनाय,
गोरा हमथा नोँ आखायजोँ
आंनि बायलुं जाब्ला गोसो।
820
नोँ मिथिगौ आंदि मा नागिरो
आङो नोँनो फोरमायनो सिगां
नोँनि मिनिस्लुनाया सोमो नाङो
नोङो उनफिन लाङो द्रोद द्रोद।
821
जेब्ला आङो बिरलाङो
नोँनि मोदोमफ्रु सोलेरनि सेराव
नोङो आंखौ एदावो
आंदि गोमो हाबो साजायनायाव।
822
समा आंखौ बुबथिँबायो
रैसुमै अब्लाबो गोबाव जायो,
नोँनो होनो रादायखौ
आंदि दाबो खोमायो।
823
जेब्लाबो नोँ मिनिस्लुयो
आंखौबो सना बोदोर जायो,
खोनासङो नोँनि गारां
मोजां मोन्नाय सोदोब मोजां।
824
आं नोँखौ जोथोनै नायो
नोङो आंनि जेरै गोग्लैया,
आंनि गोरबोआव नोँ अराय
आं मिजिँ दं बिनि।
825
बे खोमसि हराव
आंनि मेगनाव थेवबोनो
नोँनि मिनिस्लुनाया सोरां होयो,
माब्लाबा नोँजोँ आं मोखांआव।
826
नोँनि समायनाया मेगनाव
साथिसारफैयो गोरबोआव,
नोङो आंनि गोरबो बिलिरो
आंनि मोजां मोन्नाय बिखानि।
827
नोङो आंखौ रंजाहोयो
जेब्ला नोँनि मिनिनाय रिँफैयो,
आङो सानस्रि लैथोआव थब्ल'यो
गोर्बो नोँनि आं गोजोनो।
828
नोँ आंनि बिखायाव सौग्रावो
नोङो बार जाना बिरबोयो
सुदेम आंनि सोलेराव गोबायो
नोङो गोजोन जिरायो।
829
आंहा मिजिँ दं सना
समा बारै बारै फैगोन
नोङो आंनि सेराव सफैगोन
नोङो थाद'फैगोन गावनि होन्ना।
830
सैथो आं मोजां मोनो
निजोराबादि गोगो गोजोनै,
आं मोजां मोनो जिउ जिउ
गोगो गोजोँ रैसुमै आंनि।
831
आंनि थाइनै मेगना नोँनि
नोँनि महर मुस्रिनि,
आंनि थरथिँसे मोदैया नोँनि
नोँनि गुरै रैदुब आखायनि
आजाव आंनि मोजां मोन्नाय।
832
खोनासङो नोँनि रैसुमै
गोदै गहां, आंनि खोमाजोँ
निजोरानि गुसु गोजोँ दैजोँ
सुयो फेरलेबसे मैला गोसोनि;
सिथाबफ्लेनाय आंनि जिउमायाव
नोँनि हायना समायना।
833
आंनि मेलेमाव नोँनि इयुन
गोमो गोथां आंनि मोन्दांथि,
आंनि जिउमा देरायाव
गोजोन जिउनि नोँनि खुलि
रैसुमै नोँ आंनि।नोँ आंनि।
834
साना फैसालियाव दोबैबाय
मोनाबिलि मोनाबिलि
आं नोँखौ नुयो,
स्राय स्राय दैसानि लामायाव
आंनि गोसोआव मा मोनसे
हास्थायनाय गोसोनि।
835
आरांगानि सेराव आं जिरायो
गोमो गोथां सान्नायनि हांखोजोँ
नोँनो गांसे लाइजाम लिरनो,
बावगारलाङो गिदिँबायना जोमैयाव।
836
जोँब्लावनाय मोब्लिबनि सोरांजोँ
गलाब बिबार बारफैयो मेगनाव,
जोबोद समायनानिफ्राय समायनासिन,
नोँनि जारौ गुसुथिया जंखायो
खुदुमो आं, गोमोर लाङो नोँ।
837
खोमसि अख्रांनि फैसालियाव
जोँथि माथि हार्थखि मिनियो
दुगायै आं नायदावहरो
जेब्लाबो समायनानिफ्राय समायनासिन नोङो
बार जाना बिलिर फैयो सोलेराव।
838
नोङो जायख्लं आंनि नोजोरनि
गोमो गोथां बायदि साजायनाय,
आं गोमोहाबो सना
हाबिला जायो गोरबो बिखायाव।
839
आं नुयो नोँखौ
नोङो मिनिखुमायो सिरियै,
नोङो आंनि गुरै गोरबोखौ
बोना लाङो गावनि बिखायाव
गेलेनो बबेबा गोजोन देरायाव।
840
आंनि मोन्दांथिया जोबलाङाखै
सिमां बायदि मुगासेनि,
नोँनि रायदावनाया खन्थाइ आंनि
गोलाव जिउनि जिउनिफ्रायबो गोलावसिन।
841
नोङो जोमैबादि नङा
अखा जाना दान्दिसेल' फोजोन्नो
नोङो निजोरा आंनि
रैसुमै सना बोहैनाय गोरबोनि।
842
आं नोँखौ हास्थायो रैसुमै
गासै आंनि जिउमाजोँ बुंनाय
सोलेरनि गोथार गोजोँ गोरबोजोँ,
नोङो नुयो आंनि रंजानायखौ।
843
आंनि समाय सना
नोँनि जिउखौ आं फरायो,
नोँनि मिनिस्लु मिनिनाय बोजबना
नोँ आंनि रैसुमै।नोँ आंनि।
844
आं नोँनि सेरावनो
नोँनि जेरावबो दावबायनायाव,
नोँनि गनाय दुखुनि मोदै हुगारनो
नोँ आंनि समायना मिथिँगायाव।
845
नोँ आंनो गां होबाय
नोँनि सेराव आं बिरलानो,
नोँ आंखौ बिरनो फोरोँबाय
हाथर्खिनि रायजोआव बेरायनो
नोँजोँ आंजोँ सना जुलिसे अराय।
846
आंहा गोसोआव बोलोआ दं
मिथिगौ लैथोखौ बोरै बारनो?
आं मिथिगौ जेब्लाबो सना
नोँखौ दैखारलांनो देरासिम-
रैसुमै नोँ आंनि।नोँ आंनि।
847
उन्दुलांदोँब्लाबो दिनैनि हराव
सान्दोँ आं नोँजोँ आंजोँनि
बेसेबा थांखो उन्दै बैसोआ
बेसेबां आरो थागोन समा।
848
सान्दोँ नोँखौ आं
बेसेबां हास्थायो
नोँनि सावगारि नायै नायै,
मोदैया मोसायो मेगनाव
नुदोँ बेसेबां खुसि नोँ आंनि नोजोराव।
849
एखमबा आं बावनो सानो
नाथाय माब्लाबाबो हानाय नङा,
बेसेबा बोसोरनिफ्राय आं नुनाय
बेसेबा बोसोर थांबाय-
आं नोँखौ दिनैबो सिरि सिरि।
850
बैफोर सोदोबफोरा गोरबोआव
दाबो दं आंनि
बैफोर रैसुमै सोदोबफोरखौ
माब्लाबा आं बावनो हाया;
आं फोथायो सना-
माब्लाबा जोबा मोजां मोन्नाय।
851
आंहा मिजिँ दं
नोङो फैगोन गोरबोनि हांख्रायनायाव
मानोना नोँ मिथिगौ
गोजोँ गोथार आंनि हास्थायनाय।