Gae Ke Tlogile Poem by Return Malatje

Tseleng mapheko ke phekollotše,
Tšweu phišo e mphišitše,
Ka kodumela kudumela ka kgapha.
Merehubakeletšo mphago a mphago ka itatswa.
Boka wa masekane morwa hlegere ka senya,
Pele ga nako ka tsena.

Ge a omana, a kgapukana,
Morago ka gopola,
Fela la nkaparela lesedinyana,
Go goma naye ka tlotla,
Lerumo ka fera ka mo šokela ge a šokwa,
Motho setho ka kirimpa.

Wa maganagobotšwa ngwana
Ka hwetša fase faseng go fasagane,
Borole go anya ka hutšologa.
Ka ya molomo metswirinyompe go lemoga ka dira,
Ge ga ka go kirimpa e le mahlapa go yena.

Ka ya botswadi kelelelo
A lemoga ge sethitho tseleng a nkarabeditše,
Ka a botswadi maano
Thipa kabogaleng a tlimarela.
Legetleng sekoka ka bewa,
Megoleng sehlomphegi ka latšwa,
Wa monthati montswadi ka sejabana a ntaela,

Legogwa moeng tšhwaane ka alelwa,
Lehlwa ka hlwa ke apere,
Phišo ka timoga.

Nakhulwana ka retela, mereto ka retebotša ya segešu,
Mediti ke sa tsagatsage.
Wa tsela mpheti lehlaa a kgotsa mereto ke mo fago,
Polelong re thailelane,
Segabo le segešu mahwafa tša nkgisetšana.
Fela temogo ka lemoga gore go lemoga o a lemoga,
Gore morago Gae go Yena ke a boela.