Tshwarelo Mong’aka. Poem by Return Malatje

Tshwarelo Mong’aka
Tswarelo Tate ga ka itira
Ke tšerwe ke makeaya’ bašemanyana
Go la motsemollakoma ka wela,
Bodika ka dikwa ka dika le ema tša koma,
Wa koma molao ka koma,
E le ge ke thopa bogomotša selothata.

Tshwarelo Tate ga ka itira.
Ke uthauthilwe ke sauwe
Dinaka moeng ka ntlhafatša,
Komeng ka bitšwa Matsetsemetše,
Ka tsetsemetša go tloga seeng go ya putsweng,
Poo dipoo le mathari ka tlimarela,
Matsetsemetše tša bošumane ditlolamelora ka ganana,
Lebole ka tsenya, mpholo wa kokomoša.

Lehono Medit’a koma tša bophelo e re:
‘ke selabi bophelong, ke setlang tšhabeng.
Ke lebanwe ke sedi la ntloleswiswi’

Fela ke re tshwarelo Mong’aka.
Tshwarelo Tate ga ka itira.
Tshwarelo go la Gauteng.
Tshwarelo ge ke hlokile boitlimarelo.
Tshwarelo ge ke tšhuanafaditše.
Tshwarelo ge ke golofaditše.
Tshwarelo ge ke seanafaditše.
Gobane ga ka itira Mong’aka.
Ke kitilwe ke kiti setšhonasedi,
Sedimasedimošatšhaba.