Thai Poem by Return Malatje

Sa mathomo ke madumephelo go wena thai,
Ntumelele ke bee ya ka tolwane koribeng lago,
Ntumelele ke tswe sa ka sehuba dibeng bjago,
Gobane go mana ke ipona ke sa go rate wena thailontshesere,
Gobane go hwela tharing e le kgoteledi wena moloki.

Wa gago mogato o o gata ka mogato ge o re gata wena mogato,
Fela go a šupega fao o re gatilego wena matlakadibe,
Go tla se šupege bjang mehlare ka tolwane e khunamela lago lentšu.
Go tla se šupege bjang masenke direthe a eja go kwa lago lentšu.

O tau ya fase faseng sebakiša Morena borena,
O kwena meetse meetseng pheko ya bodihuetše,
O leobu sefetošafetoša mebala mekgweng,
O nogakgolo ke tseba wago mofolo,
O tholanaboreletšana ke tseba yago teng,
O ya letopanta khulwana ke tseba ago mahube.

Fela mpotše.
Wena thai, hleng o ke re dinkgišetšanamahwafa boledimo le bopula
Ke baratani go wena?
Wena thai, hleng o ka re botse le bobe ke didupanamahwafa go wena?
Wena thai, hleng o ka re mabare bare boka wa kotopedi ditumammogo o a hlatha?
Wena thai, hleng o ka re mabare bare boka wa kotopedi ditumanosi o a hlatha?
Wena thai, hleng o ka re mabare bare o Molokiramatlaohle?
Wena thai, ga botse o mang?
Ehe! Go sega ka mehla ga se go kgahlega wena sehlolahlolwa.
Hleng o ka re go kwala kwena kweneng o tla re fsegisa wena kwena’kweneng.

Ruri le ge ka tse ntši dihla o rile tsee!
ke re ga o seloselo – o lefeelafeela la mafeelafeela sedulabofeelengfeeleng,
Pelongmošitompe a marwale.
Šala ga botse, fela o se ntshifule mohla makhuralefase,
Šala ga botse, fela o tle bathong ka setho wena motho.
Go Ramasedi yago mekgwa ke e akala lehu,
Fela bjago bophelo ke bo akela bophelo.