Ngaphambi kokuba ngihambe
Ikhandlela seliphelile selisele ngentambo,
Ubumnya sekumandla kunokukhanya,
Umntanami sengimbona lufifi,
Njengemfinyezi elokoza ebumnyameni,
Izwi lakhe uma ekhala sengilizwa ngathi ukhula uphakathi ezihlahleni,
Ngimphumputhe ngimubambe isandlana,
Ngaphambi kokuthi ngihambe,
Ntandane yami wena wethumbu lami,
Zibulo lami elingumagcina wami,
Angikubheke ngamehlo ngikugcine,
Ngikuthole kulomhlaba waba wedwa kimi,
Ngakho ngakuthanda njengewele lami,
Ngakunisela njengembali yami,
Kepha manje amandla ayangiphelela,
Namhlanje ngifikelwa ukugedlezela kwezinyembezi,
Izinhlungu azinalo uzwelo nathi,
Ukugula sekuzitholele indawo emzimbeni wami,
Usizi lugifahlaza inhliziyo yami,
Lapho ngikubona ukuthi usathambile,
Awukakavuthwa ze uqine ngokwanele ukuba kulo mhlaba,
Umoya wami ugeleza awufiki ekugcineni,
Ngizibuze ngizolishiya nobani leli zinyane elisanuka umswane,
Nokho ngibone esikhulu isono lesi,
Sokushiya umphefumulo ongenalo icala,
Izwi lami awukalazi ngisho lijabule,
Ngikushushuzela ngokububula nokuquma ngenxa yezinhlungu neminjunju,
Zenyama nesidumbu esesihlabekile,
Angikakakuxoleli ngisho neyodwa indaba lena,
Angikakakukhiphi ngisho emnyango ze ngikukhombise ukuthi ilanga liphuma lishone ngaphi,
Kepha sengiyaphela ngingakakubonisi ngisho uyihlo ke,
Mntanami mhlampe ubuzoba usizo nje phambi kwami,
Kwazi bani ubuzokhula ube utho kimi,
Kepha mtanami akuhambeki ngikushiye emuva,
Njengomama onothando kuwe,
Ngizokutshatha ngihambe nawe,
Ze ngiphumule ngokuthula nawe kumele ngikuphumuze,
Ngaphambi kokuba ngihambe angikunqamule umphefumulo nawe ngane yami.
*Ngaphambi kokuba ngihambe*
This poem has not been translated into any other language yet.
I would like to translate this poem
UYAGULA lomama